БНХАУ-ын Бээжин хотноо 200 сая төгрөгийн шагналын сантай “Memory of Jiuduan” дэлхийн цомын тэмцээн боллоо. Тэмцээнд Монгол, Хятад, Герман, Австрали, Итали зэрэг орны шилдэг 200 тамирчин стандарт бус (бусад тэмцээнтэй адил биш) 6 төрлөөр өрсөлдөв.
Тус тэмцээнд манай улсыг төлөөлж Монголын Оюун Ухааны Академийн 10 тамирчин, дасгалжуулагч багшийн хамт амжилттай оролцлоо. Тодруулбал, тэмцээний эцсийн дүн гарахад Монгол Улсын баг 36 медалийн 19-ийг, 3 цомын 2-ыг нь тус тус хүртэн үнэмлэхүй ялалт байгуулж, тэргүүн байрт шалгарав.
Ингээд нас насны ангилал болон нийлбэр оноогоор эхний гурван байрт орсон тамирчдыг танилцуулъя.
Өсвөр насны ангилал:
1- р байр : ОУИМ Э.Лхагвадулам – 7233 оноо
2-р байр : Их Мастер М.Уянга – 6115 оноо
3-р байр : Б.Лхагвадорж – 5165 оноо
Насанд хүрэгчид:
1-р байр : ОУИМ Н.Мөнхшүр – 8191 оноо
2-р байр : ОУИМ Simon Reinhard – 7416 оноо
3-р байр : ОУИМ LiYang – 7069 оноо
Нийлбэр дүнгээр:
1-р байр : ОУИМ Н.Мөнхшүр – 8191 оноо
2-р байр : ОУИМ Simon Reinhard – 7416 оноо
3-р байр : ОУИМ Э.Лхагвадулам – 7233 оноо
Тэмцээний үеэр “Хурдны Хөзөр” төрөлд 1 багц буюу 52 ширхэг хөзрийг ердөө 14 секундэд тогтоож алдаагүй санаснаар Б.Шижир-Эрдэнэ дэлхийн дээд амжилт тогтоолоо.
Тэмцээний төгсгөлд шилдэг 12 тамирчин гурван багт хуваагдаж телевизийн том шоу нэвтрүүлэгт орж тархины гайхамшгийг харуулж өрсөлдсөн бөгөөд BBC, CCTV зэрэг олон телевиз сурвалжлав.
Ийнхүү Монголын Оюун Ухааны Академийн баг тамирчид 2008 оноос хойш өнөөг хүртэл олон улсын 49 дэх тэмцээндээ амжилттай оролцон 789 медаль хүртэн дэлхийн олон дээд амжилтыг шинэчлэн тогтоож шагналын буухиагаа үргэлжлүүлсээр байна.
