Автомашины шилжилт хөдөлгөөнийг хийлгэхдээ заавал өөрийн биеэр очиж шилжүүлэхийг Авто тээврийн Үндэсний төвөөс /АТҮТ/ анхаарууллаа. Учир нь иргэд, ААН-үүд ихэнхдээ автомашины шилжилт хөдөлгөөнийг нотариатаар итгэмжлэх хийлгэх, худалдах, худалдан авах гэрээг үндэслэн шилжүүлдэг байна. Ингэж шилжүүлснээр иргэдэд татвар төлөөгүй, оношлогоонд ороогүй, торгуулийн хуудас их ирдэг гэдгийг анхаарах хэрэгтэй. Өөрөөр хэлбэл, хэдийгээр тухайн иргэн автомашинаа зарсан ч шилжилт хөдөлгөөн хийлгээгүй бол нэр дээр нь торгуулийн хуудас ирнэ. Түүнийг нь ашиглаад янз бүрийн гэмт хэрэг үйлдэгдэх, цааш нь худалдах, ББСБ-д тавьж ашиг хонжоо олох зэрэг хууль бус хэрэг гардаг байна. Улмаар цагдаагийн байгууллагаас эзэмшигчийг нь тодруулан шалгаж эхэлдэг. Тэгэхийн тулд Авто тээврийн үндэсний төвөөс эзэмшигчийнх нь хаяг мэдээллийг авна. Ингээд эзэмшигчийн хаягаар цагдаагийн байгууллага очно гэсэн үг. Ийм олон эрсдэлийг дагуулах учир иргэд автомашинаа худалдсан бол өөрийн биеэр бичиг баримтаа шилжүүлэх шаардлагатай юм байна.
МУ-ын хэмжээнд 851179 автомашин бүртгэлтэй байдгаас нийслэлд 600 мянган нь бий. Тэрнээс 450 мянга орчим нь татвараа төлж, оношлогоонд идэвхитэй оролцдог бөгөөд АТҮТ-д өдөрт 300 гаруй автомашин шинээр бүртгэгдэж, 800 гаруй автомашины шилжилт хөдөлгөөн хийгддэг аж. Улаанбаатар хотод АТҮТ найман цэгт тээврийн хэрэгслийн шилжилт хөдөлгөөн, бүртгэлийн үйл ажиллагаа явуулж байна.
Ийнхүү худалдаж авч байгаа хүн нь өөрийн биеэр АТҮТ-д ирж шилжүүлэг хийлгэдэггүй, машинаа зарж байгаа хүмүүс ч үүнийг шаарддаггүй нь дээрх олон талын эрсдэлийг дагуулдаг гэдгийг дахин анхуурлъя.
