Мөрийтэй тоглоомчдыг буу, хутга хэрэглэн дээрэм үйлдсэн Н.Ариунгэрэл, М.Амартүвшин нарын 7 хүний давж заалдах шатны шүүх өнөөдөр өглөө 9:00 цагт Эрүүгийн хэргийн давж заалдах шатны шүүхэд товлогдоод байсан юм.
Хэргийг сануулвал, одоогоос хоёр жилийн өмнө Сүхбаатар дүүргийн нутаг дэвсгэрт байрлах “Элит” хотхонд мөрийтэй тоглож байсан хэсэг этгээдийг байлдааны зориулалттай АК маркын буугаар хий буудаж сүрдүүлээд тоглоомчдын мөрийнд тавьж байсан 1.2 кг алт, 45 сая төгрөг, 2000 ам.долларыг нь дээрэмдэж, нийт 57.4 сая төгрөгийн хохирол учруулсан хэрэг гарсан байдаг. Мөн тэд бусдын биед хүнд, хөнгөн зэрэг гэмтэл учруулсан болох нь мөрдөн байцаалтын явцад тогтоогдсон юм. Энэ хэргийг “шош” хочит Н.Ариунгэрэл, Б.Насандэлгэр, Л.Алтанхуяг, Н.Билэгбаатар, М.Амартүвшин, С.Галбадрах, Д.Алтангадас нар бүлэглэн үйлдсэн болох нь тогтоогдож анхан шатны шүүх 2018 оны зургадугаар 14-ний өдөр “… шунахайн сэдэлтээр, бусдын эд хөрөнгийг авах зорилгоор зэвсэглэн дээрэмдсэн гэм буруутайд тооцож, Н.Ариунгэрэлд найм, Л.Алтанхуяг, С.Галбадрах нарт зургаа, М.Амартүвшинд долоо, Н.Билэгбаатарт 11 жил хорих ял оноож, Д.Алтангадасыг нэг жилийн хугацаагаар тэнсэн харгалзах ял оноосон.
Харин уг хэргийг шүүн шийдвэрлэх Эрүүгийн хэргийн давж заалдах шатны шүүх хурал өнөөдөр прокурорын хүсэлтээр аравдугаар сарын 2-ны өдөр хүртэл хойшлогдсон байна.
