Нийслэлийн МАН-ын 34-р Бага хурал өчигдөр өглөөнөөс эхлээд өнөөдөр үүрийн 05:00 цаг хүртэл хуралдсаны эцэст удирдлагаа сонгосон байна. МАН-ын Удирдах зөвлөлөөс Нийслэлийн МАН-ын хорооны даргад Нийслэлийн засаг дарга С.Батболдыг дэвшүүлэхээр нэрийг нь оруулсан бол заалнаас Уул уурхай, хүнд үйлдвэрийн сайд Д.Сумъяабазарын нэрийг дэвшүүлжээ.
Санал хураалтад оролцсон нийт төлөөлөгчдөөс С.Батболд 164 Д.Сумъяабазар 167 санал авсан байна. Ийнхүү Д.Сумъяабазар 50.4 хувиар ялалт байгуулж, Нийслэлийн МАН-ын хороог удирдахаар боллоо. Харин Нийслэлийг засаг дарга С.Батболдын дотоод сонгуулийн ялагдлыг “28 жилийн турш Нийслэлд хүчтэй оршсоор ирсэн МАН-ын хотын фракци анх удаа ялагдал хүлээлээ.”, “Бага хурлын гишүүд энэ удаагийн сонгуулиар намдаа шинэ салхи оруулах, 60 тэрбумаас ангижрах алхам боллоо” гэх мэтээр хурлын төлөөлөгчид дүгнэн хэлэлцэж байгаа аж.
Саналын хуудсыг автомат машинаар тоолж, гар аргаар дахин дүнг нэгтгэжээ. Тооллогын комисст ажилласан эх сурвалжийн мэдээлж буйгаар 18 санал хүчингүй болсон бөгөөд үүнээс Д.Сумъяабазар 11, С.Батболд 7 санал авсан байсан аж. Гэвч уг саналын хуудсууд автомат тооллогын техникийн шаардлага хангаагүй байсан тул хасагджээ.
Намын дүрмийн дагуу нийслэлийн намын хорооны тэргүүлэгч 13-15 байдаг. Тэгэхээр шинэ дарга нэн тэргүүнд Тэргүүлэгч, тэр дундаа сонгогдсон УИХ-ын гишүүд зэрэг МАН-ын тэргүүний, чадварлаг залуусаар багаа бүрдүүлж, намын анхан шат, үүрт тулгарч байгаа асуудлуудыг ойрын хугацаанд ажлын төлөвлөгөө гаргаж шийдэж ажиллах төлөвлөгөөтэй байгаа юм байна. Эхний ээлжинд авч хэрэгжүүлэх арга хэмжээгээ хороо, үүрээс эхлүүлнэ гэлээ.
Ийнхүү Д.Сумъяабазар УИХ, Засгийн газрын гишүүн дээр нэмж нийслэлийн намын бодлого тодорхойлох ажлыг хавсран гүйцэтгэхээр боллоо.
