Дундговь аймгийн Адаацаг сумын Сүм багийн “Сүмийн хөх бүрд” гэдэг газар явган аялалд оролцож явсан Улаанбаатар хотын Чингэлтэй дүүргийн харьяат 75 настай ахмад настан /эрэгтэй/ энэ сарын 6-ны 21:00 цагийн орчим сураггүй алга болжээ. Аялж явсан газар нь сумын төвөөс зүүн урд зүгт 30 км-т оршдог аж.
Түүнийг алга болсон тухай дуудлагыг 10.07-ны өдрийн 01:50 цагт өгчээ. Дуудлагын дагуу тус аймгийн Онцгой байдлын газрын алба хаагчид 05:05 цагаас эрэн хайх ажиллагааг эхлүүлсэн байна. Улмаар мөн өдрийн 09:30 цагт тухайн алга болсон газраас хойд зүгт 12 км-т орших “Цамын-Ус” гэдэг газраас эсэн мэнд олж аяллын багийн ахлагчид хүлээлгэн өгчээ.
Тэгвэл Дорнод аймгийн Хэрлэн (Сүмбэр) сумын төвд, 6 дугаар багийн “Далан” гэдэг газар тус сумын харьяат 49 настай Б /эрэгтэй/ нь усанд осолдож амиа алдсан харамсалтай хэрэг гарчээ. Тэрээр энэ сарын 5-ны өдөр “Хэрлэн” голд осолдсон байж болзошгүй тухай дуудлагыг 6-ны 14:28 цагт мэдэгдсэн байна. Ингээд тус аймгийн Онцгой байдлын газрын алба хаагчид 15:00 цагаас эхлэн эрэн хайх ажиллагааг зохион байгуулж, 7-ны 11:30 цагт тус сумын 5 дугаар багийн “Чацарганы талбай” гэдэг газар “Хэрлэн” голоос цогцсыг нь олж цагдаагийн байгууллагад шилжүүлэн өгсөн байна. Талийгаачийг алга болсон газраас зүүн зүгт 7 км-с олжээ.
