Өнгөрөгч долоо хоногт Монголын улс төрд ихээхэн шуугиантай долоо хоног болж өнгөрлөө. УИХ дахь МАН-ын бүлгийн дарга асан Д.Хаянхярвааг МАН-ын дарга У.Хүрэлсүх огцруулсны төлөөс болгож түүний Засгийн газрыг УИХ дахь МАН-ын бүлгийн 27 гишүүн Ерөнхий сайдыг огцруулах бичигт тэр орой нь гарын үсэг зурсан. УИХ-ын дарга хүртэл гарын үсэг зурж “өөртөө өргөн барьсан” энэхүү асуудлыг мягмар гаригт Төрийн байгуулалтын байнгын хороогоор авч хэлэлцэхэд 62.5 хувийн саналаар Ерөнхий сайдыг огцруулах санал дэмжигдэв. Энэхүү санал хураалтын дараа У.Хүрэлсүхийн Засгийн газар унах байх гэсэн магадлал илүү болсон хэдий ч Засгийн газрыг огцруулах эсэхийг УИХ-аар хэлэлцэхийн өмнөх өдөр МАН-ын Хяналтын хороо хуралдаж, УИХ-ын дарга М.Энхболд, Боловсрол, соёл, шинжлэх ухаан, спортын сайд Ц.Цогзолмаа, УИХ-ын гишүүн Д.Оюунхорол, Ж.Мөнхбат, Н.Номтойбаяр, Д.Хаянхярваа нарын зургаан гишүүнийг хөөх шийдвэр гаргасан гэх мэдээлэл цацагдаж эхэлсэн юм. Гэхдээ энэ шийдвэрийн талаар МАН-ын Хяналтын хороон дарга Д.Батбаатар үгүйсгэсэн мэдээлэл хийсэн байдаг. Харин ийм шийдвэр гарсан нь үнэн ч шийдвэрээ буцаасан болохыг Хяналтын хорооны гишүүн Х.Болдмандал мэдэгдсэн юм.
Хэрэв энэхүү Хяналтын хорооны шийдвэр албажиж хэрэгжсэн бол намаасаа хөөгдсөн УИХ-ын зургаан гишүүний дараагийн алхам юу байх вэ? Энэ талаар УИХ-ын гишүүн Н.Номтойбаяр “Хяналтын хороо уг тогтоолоо үйлдэж чадаагүй. Намын дүрэмд маш тодорхой бий. Би тогтоолоо хүлээгээд намын батлахаа өгөх гээд хүлээгээд байна. Өчигдөр сонсоод намынхаа батлахыг өвөртлөөд явж байна… Би Хөдөлмөрийн үндэсний намд элсэхгүй. Би намд биеэ үнэлж явдаг хүн биш” гэж мэдэгдсэн юм. Түүнийг эцгийн МАК “Цагаан суварга” орд газрыг хууль бусаар эзэмшдэг гэж үзэж энэхүү шийдвэрийг гаргасан юм.
Ерөнхий сайд “гарын үсэг зурсан 27 гишүүн бүгд буруутай гэж үзэхгүй байна. Найз нөхдөө бодоод, хүн чанар гаргаад гарын үсэг зурсан хүмүүс бий” гэснээс үзвэл огцруулах хүсэлт гаргасан гол гишүүд гэж дээрх зургаан гишүүнийг хөөх хүсэлт гаргасан байж магадгүй. Хэрэв хяналтын хорооны тогтоол албажиж гишүүд намаасаа хөөгдсөн бол яах бол? УИХ-ын дарга М.Энхболд дүү нараа дагуулаад шинэ нам байгуулж улстөрийг цэвэрлэнэ гэх байх даа. Эсвэл гарал нэгтэй хуучны танил Н.Энхбаяр ах дээрээ алд цэнхэр хадаг бариад очихоос өөр сонголтгүй.
