Сонирхогчдын боксын олимп, ДАШТ-ий мөнгөн медальт, Гавьяат тамирчин Н.Төгсцогт одоогоор мэргэжлийн боксын рингэнд арван тулаан хийгээд байна. Тэгвэл тэрээр дараагийн тулаанаа Доминиканы боксчин Клаудио Марреротой хийхээр болжээ. Хоёр боксчны тулааны тов гарч ирэх 2019 оны нэгдүгээр сарын 26-д АНУ-ын Нью-Йоркийн Бруклин дэх “Barclays Center”-т тоглохоор болсон байна.
Мэргэжлийн боксын рингэнд арван тулаан хийж ялагдал гэдгийг амсаагүй яваа “Кing Tug” хочит Н.Төгсцогт хамгийн сүүлд 2018 оны тавдугаар сард Колумбын боксчин, “Дайчин” хочит Оскар Эскандоныг ялсан билээ. Энэхүү тулааныг “Premier boxing championship” сарын онцлох тулаанаар нэрлэж байсан юм.
Н.Төгсцогтын дараагийн өрсөлдөгч болох Доминиканы Клаудио Маррерогийн хувьд 2017 онд Перугийн К.Самбраног ялан дэлхийн аварга болсон ч Пуэрто Рикагийн Х.Рохастай тулаан хийгээгүйн улмаас бүсээ алдсан юм.
Энэхүү тулааныг маш хүчтэй тулаан болно гэдгийг дэлхийн хэвлэл мэдээллүүд бичсээр байна.
