\”Операция шторм\” тэмцээний тухай

Та бүхэнд амалсаны дагуу \”Операция шторм\” тэмцээн/төслийн тухай бичиж байна. Сонгуулийн сурталчилгаа эхэлсэн энэ үед сонирхож унших хүмүүс хэр олон байгааг сайн мэдэхгүй байгаа хэдий ч манайхан энэ тэмцээнээс зарим нэг санаа аваасай гэсэндээ цагаан хүсэл буйг ойлгон уншихыг хүсье.

$\"\"$

НЭГ ДЭХЬ ӨДӨР

Энэ төслийн тухай өмнөх бичлэгт дурьсан байгаа тул шууд энэ өдөр болсон үйл явдлын тухай бичлээ. Москва хот дахь Угрешскийн гудамжид байх цэрэг татлагын байранд төсөлд оролцогчдыг цуглуулав. Баг бүр 7, нийт 14 хүн дээрээс нь 2 хүний нөөцтэй тэмцээн эхлэх ёстой ба эдгээр залуус өмнө нь хоорондоо огт уулзаж байгаагүй хүмүүс гэдгийг анзаарах хэрэгтэй. Эхлээд тэднийг цэргийн эмнэлэгт эрүүл мэндийн болон сэтгэлзүйн үзлэгт оруулаад тэнцсэн хүмүүст цэргийн дүрэмт хувцас тавьж олгов. Ингээд өмнө нь цэрэгт алба хааж байсан залуусыг 1-р тасагт, харин алба хааж үзээгүй залуусыг 2-р тасагт хуваарлиад хоёр тусад нь автобусад суулгаж Рязань хот дахь Шүхэр-десантын дээд сургуулийн байнгийн байрлал руу 200 км зайд хөдөлгөөн үйлдлээ. Залуучууд замд хоорондоо сайхан танилцаад хүрэн ёстой газраа явж очив. Очоод хотын захаар урсаж буй 100 гаруй метр өргөнтэй \”Ока\” голыг цэргийн зориулалттай ус гатлалтын инженерийн гатлага онгоцоор туулав. Голын нөгөө эрэг дээр шүхэр-десантын мэргэжлийн сургагч багш нар тэднийг тосож авсаны дотор хоёр эмэгтэй сургагчид(эдгээр цэргийн бүсгүйчүүд бол мэргэжлийн холбоочид юм. Р.Э) багтаж байв. Хамгийн түрүүнд галт зэвсэг, техниктэй харьцах аюулгүйн зааварчилгааг танилцуулж, хүн нэг бүрээр гарын үсэг зуруулсан. Дараа нь сургалт явуулах шүхэр-десантын сургууль, хээрийн дадлага явуулах полигоны тухай товч танилцуулга хийв. Уг газар нь тэр чигтээ ой, модоор хучигдсан тул могой болон зарим хортон шавьж байгаа тул болгоомжтой байхыг сануулж байв.

$\"\"$

Энэ бүхний дараа хоёр тасгийн бие бүрэлдэхүүнд шаардлагатай зэвсэг, хувцас, эд хэрэгслэл тавьж олгов. Үүнд: ногоон өнгөтэй өнгөлөн далдлалтын хувцас, сум үл нэвтрэх хантааз, дуулга, том хэмжээний үүргэвч, хүн нэг бүрийн хамгаалалтын цогц, газын маск, жижиг хүрз, усны дашмаг олгов. Тасаг бүр орон тооны дагуух зэвсэглэл, агсамж хүлээж авсан. Үүнд: тасгийн пулемётчин 7,62 мм-ийн ПК, гранатомётчин РПГ-7 харин бусад нь АК-74 автоматыг подсумка, нөөц магазины хамтаар хүлээлгэн өгчээ. Дээрээс нь тасаг бүрт сум, галт хэрэглэлийн нэг нэг том модон хайрцаг өгсөн. Ингээд хүн нэг бүр өөрт нь тавьж олгосон зэвсэг, хэрэглэлийг биедээ тааруулж, өмсөж зүүсэн ба энэ бүхэн ойролцоогоор 40 кг жинтэй болж байв. Удалгүй тасгийн захирагч анхны даалгавраа хүлээн авлаа. Энэ бол тасаг тогтоосон маршрутын дагуу явган марш үйлдэж, заагдсан газар, тогтоосон хугацаанд очих ёстой юм. Эхний өдрийн явган маршид 2-р тасгийнхан түрүүлж барианд орлоо.

ХОЁР ДАХЬ ӨДӨР

$\"\"$

Өглөөний 06.00 цагт \”Рот босоод,\” гэсэн чанга дуугаар майханд унтаж байсан бүрэлдэхүүн халуун хөнжлөөсөө суга үсэрч бослоо. Өчигдөр явган маршаар явж ядарч ирээд хээрийн байрлалд байрлаж, майханд хоносон юм. Энэ майханд цэргийн алба хаагчид шаардлагатай ор, дэр, цагаан хэрэглэл, түмбүүшиг, хувцасны шүүгээ гээд бүхий л зүйлс бий. Майханд агаар сэлгэгч суурилуулж өгсөн нь тодорхой хэмжээгээр хүйтэн байлгах ба энэ шумуулаас сэргийлэх зорилготой гэнэ. Модон дотор байгуулсан энэхүү хээрийн байрлалыг тус сургуулийн сонсогчид \”Немецийн лагерь\” гэж хочилдог ажээ. Эрт боссон хүмүүс өглөөний гүйлт, гимнастик хийж тухайн өдрийг эхлүүллээ. Гүйлт, сунгалт, гар дээр болон турник дээр суниалт, хүчний дасгалуудыг нормативын дагуу хийж гүйцэтгэх ёстой. Өглөөний дасгалын дараа гар нүүрээ угааж, цайгаа уусны дараа \”Камаз\” машинд ачигдан сургуулийн үндсэн байрлал руу явна.

$\"\"$

Тэнд шүхэрчид бэлтгэх зориулалтын дороо маш хүчтэй сэнс бүхий тусгай агаарын хоолойд \”орж\” үзүүллээ. Энэ нь онгоцноос гараад чөлөөт уналт хийн, агаарт хөвж явах үеийг дуурайлган үзүүлэх зориулалттай юм. Ийм хоолойд нэг минут байх нь 6000 метрийн өндрөөс газарт буухтай адилхан хэмжээний хугацаа гэнэ. Энэ бүхний дараа өдрийн хоолонд ороод тухайн өдрийн шалгалтыг давах ёстой болов. Тэр бол бүхий л зэвсэг, хэрэглэлтэй ерөнхий цэргийн саадыг тасгаараа туулах явдал байв. Тасаг саадын зурвасыг туулж байх явцад сургагч багш нар тэдний дээгүүр хоосон сумаар буудаж, утаан хөшиг, гал тавьж байгаа нь сэтгэлзүйн бэлтгэлийн нэг хэсэг болж байв.

Энэ удаадаа энэ хүрээд өндөрлөж байна. Дараагийн удаа гурав болон дөрөв дэхь өдрүүдийн тухай бичье.

Р.Энхболд

$\"\"$