Үндэсний агаарын тээвэрлэгч МИАТ ТӨХК агаарын хөлгийн парк шинэчлэлийн хүрээнд АНУ-ын Боинг компанид үйлдвэрлэсэн хамгийн сүүлийн үеийн технологи бүхий В737МАХ8 агаарын хөлгөө өчигдөр хүлээн авчээ. Ийнхүү МИАТ ТӨХК В737МАХ-8 агаарын хөлөгтэй болсноор өнөөдрийн байдлаар нийт 7 ширхэг агаарын хөлөгтэй болж байна.
ЕI-MNG бүртгэлийн дугаартай“Тулуй Хаан” В737МАХ8 агаарын хөлгийг багш нисгэгч Ч.Нямсайхан, Ч.Хуяг, II нисгэгч З.Ганзориг, Г.Баатарцогт нарын бүрэлдэхүүнтэй баг АНУ-аас эх орондоо авчирлаа.
Тус агаарын хөлгийг хүлээн авах ёслолын арга хэмжээнд ЗТХ-ийн сайд Я.Содбаатар, ЗТХ-ийн дэд сайд Л.Халтар, Төрийн нарийн бичгийн дарга С.Батболд, ИНЕГ-ын дарга Л.Бямбасүрэн болон МИАТ компанийн төлөөлөл оролцсон байна.
Энэ үеэр МИАТ ТӨХК-ийн Гүйцэтгэх захирал Д.Баттөр: “МИАТ компани агаарын хөлгийн парк шинэчлэлтээ үе шаттай хэрэгжүүлэх төлөвлөгөөний дагуу “Боинг” болон “Аволон” компанитай гурван талт хэлцэл хийсний үр дүнд 4 ширхэг В737МАХ-8 агаарын хөлөг хүлээн авахаас өнөөдөр эхний агаарын хөлгөө хүлээн авч байна. Монгол Улсын Засгийн Газрын 2016-2020 оны үйл ажиллагааны хөтөлбөрт “Монгол Улс руу чиглэсэн олон улсын нислэгийн давтамж, чиглэлийг нэмэгдүүлэх“-ээр тусгасан. Иймд манай компани Засгийн газрын үйл ажиллагааны хөтөлбөрийн дагуу нислэгийн сүлжээгээ өргөжүүлэх, Азийн чиглэлд зах зээлээ тэлэх болон олон улсад нэр хүндтэй авиакомпаниудтай эн тэнцүү өрсөлдөх бизнесийн чадвараа дээшлүүлэхэд В737МАХ-8 агаарын хөлгүүд чухал үүрэг гүйцэтгэх нь гарцаагүй. МИАТ-чууд бид зах зээлийн өрсөлдөөнд өөрийн байр сууриа бэхжүүлж, зорчигч үйлчлүүлэгчидийнхээ тав тухтай байдлыг хангах зорилгоор 2019-2020 онд хамгийн сүүлийн үеийн дэвшилтэт технологийн шийдэл бүхий Б737МАХ-8 маягийн дөрвөн агаарын хөлгөөр парк шинэчлэлт хийснээр хамгийн залуу насжилттай агаарын хөлөг бүхий авиакомпанийн нэг болно” хэмээн хэллээ.
ЕI-MNG бүртгэлийн дугаартай “Тулуй Хаан” В737МАХ8 агаарын хөлгийн үзүүлэлт:
– Түлшний зарцуулалт 14 хувиар багассан.
– Дуу чимээ 40 хувиар багассан.
– 737MAX-8 бизнес 12, энгийн 150 суудалтай боловч 189 энгийн суудалтай болгох хувилбартай. Суудал бүр USB цэнэглэгчтэй.
Байгаль орчинд ээлтэй технологи:
– Агаарт ялгаруулах нүүрс хүчлийн хий харьцангуй бага тул байгальд ээлтэй тээврийн хэрэгсэлд тооцогддог.
Зорчигчийн тав тухын хувьд:
– Onboard wi-fi-тай /зорчигч өөрийн гар утас, таблетаараа Wi-fi сүлжээ ашиглан агаарын хөлгийн үзвэрийн системтэй холбогдож Hollywood-ийн кино, үзвэрээс сонгон үзэх боломжтой/
– Зорчигчийн бүхээгийн гэрэлтүүлэг тав тух хуучин загвараас илүү сайжирсан.
Техникийн үзүүлэлтийн хувьд:
– Их биеийн онцлох өөрчлөлт шинэчлэлтүүд:
o Хөдөлгүүрийг шинэчлэн CFM LEAP-1B хөдөлгүүртэй болсон, хөдөлгүүрийн хэмжээ томорсноор хүчин чадал сайжирсан.
o Сүүл болон далалвчны дизайн шинэчлэн сайжирснаар аеродинамикийн үзүүлэлт нэмэгдсэн.
– Нисэгчийн бүхээг доторх хянах самбар дэлгэцүүдэд дэвшилтэт технологийн дэлгэцээр солигдсон.
– Дээрх өөрчлөлтүүдийн тусламжтайгаар нислэгийн алслалт тодорхой хэмжээгээр нэмэгдсэн.
Дэлхийн агаарын тээвэрлэгч бүр эдийн засгийн өндөр үр өгөөжтэй, найдвартай ажиллагаатай, тохь тухтай агаарын хөлгийг эрэлхийлж буй өнөө үед В737МАХ-8 агаарын хөлөг нь агаарын тээврийн зах зээлд хамгийн их борлуулалттай байгаа дундын зайн агаарын хөлөг юм.
Эх сурвалж: МИАТ
