З.Энхболд: Иргэд Эрдэнэс Тавантолгойн ногдол ашгаа авах нөхцөл бүрдсэн

Ерөнхийлөгчийн Тамгын Газрын дарга З.Энхболд УИХ-ын чуулганы танхимын үүдэнд цаг үеийн асуудлаар сэтгүүлчдэд мэдээлэл хийлээ.
Мэдээллийн эхэнд Ерөнхийлөгчийн зүгээс УИХ-ын ээлжит бус чуулганаар хэлэлцэх асуудлын жагсаалтад зарим асуудлуудыг оруулах талаар мэдээлэл өгч сэтгүүлчдийн асуултад хариулсан юм.
– Жанжин штабын харьяанд байдаг цэргийн ангиудад удаа дараа цэрэг, албан хаагч нар амиа алдлаа. Үүнд хэн хариуцлага хүлээх вэ?
– Жанжин штабын ажил хэвийн явж байгаа. Орлогч нар ажлаа хийж байгаа. Цэргийн ангид гарсан харамсалтай хэргийн талаар Жанжин штабаас мэдээлэл өгсөн. Ер нь бол нэг байгууллага ийм удаан хугацаагаар даргагүй байж болохгүй.
-Эрдэнэт үйлдвэрт онцгой дэглэм тогтоох Засгийн газрын шийдвэрийг Ерөнхийлөгч дэмжиж байгаа юу?
-Эрдэнэтийн 49, 51 хувь гэхгүй Эрдэнэт үйлдвэр 100 хувь удирдлагын асуудалтай байгаа учраас Ерөнхийлөгчийн зүгээс тус үйлдвэрт онцгой дэглэм тогтоохыг дэмжиж байгаа.
Мөн ҮАБЗ Сайншандын төмөр замын ажлыг энэ хавар эхлүүлэх шийдвэрт хүрсэн. Үүнийг ЭТТ-н ашгаар тавина. Төр 85 хувийн ашгаа авч төмөр зам тавих гэж байгаа учраас иргэд ногдол ашгаа заавал авах нөхцөл бүрдсэн.
– 49 хувийг дотоодын компани худалдаж авах үед та УИХ-ын дарга байсан. Та уг хэрэгт холбоотой юу?
– 49 хувийг надад мэдэгдэхгүйгээр, хулгайгаар нууцаар тэр компанид өгсөн. Уг нь би УИХ-ыг төлөөлж байсан. 49 хувийг хувийн компани авч болохгүй гэж би үзэхгүй байгаа. УИХ-аас асуугаад гишүүдийн олонх дэмжээд ямар ч хувийн компани авч болох байсан. Тиймээс үүнд миний оролцоо байхгүй.
– Орд газруудыг улс өөрийн мэдэлд авах асуудалд ҮАБЗ байр сууриа нэгтгэсэн үү?
– 400 гаруй ордыг улс нээчихсэн байхад нээгээгүй мэтээр зальдаад 400 гаруй ордод дахин хувийн компанид хайгуулын лиценз өгсөн байна.
ҮАБЗ-ийн хурал дээр аливаа орд бол улсын өмч гэдэг шийдэлд хүрсэн. Н.Номтойбаяр Цагаансуварга дээр уурхай бариад хөрөнгө оруулалт хийчихсэн гээд байгаа. Орд улсынх, уурхай Номтойбаярынх. Тиймээс улс баялагаа авахын тулд Номтойбаяртай баялагийг маань гаргаад өг. Төлбөрийг нь төр төлнө гэх агуулгатай гэрээ байгуулна. Түүнээс биш төр Номтойбаярын хөрөнгө оруулалтыг төлөхгүй.