Өнөөдөр Засгийн газрын хуралдааны дараа ХЗДХ-ийн сайд Ц.Нямдорж сэтгүүлчдэд мэдээлэл хийлээ. Энэхүү мэдээллийн үеэр Засгийн газраас “Монголросцветмент”, “Эрдэнэт” үйлдвэрийг улсын үйлдвэр болгох шийдвэр гаргасныг мэдэгдлээ. “Эрдэнэт” үйлдвэрийн захирлыг Засгийн газраас томилдог бол “Монголросцветмент”-ийн захирлыг Төрийн өмчийн бодлого, зохицуулалтын газраас томилдог юм.
-Улсын үйлдвэрийн статусаар ажиллана гэхээр үйлдвэрийн удирдлагыг солино гэсэн үг үү?
-Үйлдвэр 100 хувь төрийн мэдэлд орж байгаа учраас Засгийн газар Х.Бадамсүрэнг өөрчлөх эсэх тал дээр байр сууриа илэрхийлэх байх.
-“Эрдэнэт”-ийн 49 хувийн асуудал юу болж байгаа вэ?
-Энэ бол зүгээр нэг үйлдвэрийн асуудал биш. Маш ноцтой асуудал. Цаашид улс төрийн намууд, хууль зөрчигчид УИХ, төрийг барьцаалж үлдэх үү эсвэл үгүй гэдэг л асуудал. УИХ, Цэц хоёр “Эрдэнэт” үйлдвэрийн асуудлаар шийдвэрээ гаргачихсан. Худалдаа хөгжлийн банк “Эрдэнэт” үйлдвэрийн 49 хувийг худалдаж авсан асуудлыг шалгаад бүх материалыг гаргаж, УИХ шийдвэрээ гаргасан. Улсаас 400 сая ам.доллар гаргуулж, худалдаж авсан нь үнэн. Би энийг олон удаа хэлсэн. Би ард түмэн та нарыг ялна гэж хэлсэн нь системийг нь хэлсэн юм. Би нэг зүйлд сэтгэл хангалуун байна. Ард түмэн олон жилийн хулгай луйварт дасч байснаа одоо сэрж байна. Монголын хамгийн өөдтэй, өнгөтэй бүхэн энэ нөхдүүдийн гарт орсон. Яг үнэндээ “Эрдэнэт” үйлдвэрийн 51 хувийг барьцаанд тавиагүй, баталгаа л гаргасан.
-Эрүүгийн цагдаагийн газраас ямар ажиллагаа явуулсан юм бэ. Ерөнхийлөгч асан Ц.Элбэгдоржийн гэрт нэгжлэг хийсэн гэсэн ч өөрөө үгүйсгэсэн?
-Би хэвлэлд дээр гарсан мэдээллийг нь олж уншсан. Зарим нэг галлерейд барьсан зургийг хурааж авсан зүйл байгаа гэсэн.
–С.Зоригийн хэргийн талаар мэдээлэл өгөөч, энэ хэрэгтэй холбоотойгоор шалгаж байсан хүмүүсийг хорьсон гэсэн мэдээлэл байна?
-С.Зоригийн амь настай холбоотой эрүүдэн шүүх ажиллагаа явуулсан нь тодорхой болсон. Энэ асуудлыг аюулгүй зөвлөлд мэдээлэл өгөх байх. Хоёр тагнуулын ажилтан, энэ бүхнийг зохион байгуулахад гар бие оролцсон гурван хүн хоригдсон. Би сайдын ажлаа авсны дараа нэг хүнийг ажлаас халсан. Энэ бүхэн учиртай. Одоо яг тэр хүн шалгагдаж байгаа. Монголд цаашид үеийн үед 37 оны хэлмэгдүүлэлт хэзээ ч болохгүй гэж бодож байна. Би тэр хоёр яллагдагчтай очиж уулзсан. Хийгээгүй хэрэгт хэлсээр шийтгүүлж, хүйтэн камерт яаж амьдардгийг нь харах гэж би очиж уулзсан. Өчигдөр Ч.Содномдаржаа, Т.Чимгээ хоёрыг эмнэлэгт хэвтүүлсэн. Энэ хоёр хүний ар гэрээс Монгол төрийн өмнөөс уучлал гуйж байна, би ер нь өмнө нь уучлалт гуйж байгаагүй юм шүү.
-Хорих 461-р ангид Л.Бямбаа нас барсан. Энэ асуудал юу болсон бэ?
-Энэ асуудлаар цагдаагийн байгууллагад ар гэрийнхэнтэй нь уулзаж, аль аль талаасаа ойлголцож байгаа байх. Салхитын мөнгөний ордын асуудал дээр хуулийнхан оролцсон юм байгаа, хуулийн байгууллага шалгаж байгаа.
-“Эрдэнэт”-ийн 49 хувийн асуудалтай холбогдуулан хэд хэдэн шүүгчийн нэр яригдаж байгаа. Эдгээр шүүгчдийг шалгаж байгаа юу?
-Хууль зүйн сайд прокурор, шүүх, тагнуулын байгууллагын ажиллагаанд оролцдоггүй. Мөн энэ хэрэгтэй холбоотой баривчилгааг хууль бусаар зохион байгуулсан гэж шүүх шийдвэр гаргасан.
–Энэ баривчилгаа хууль зөрчсөн үү?
-Хойшлуулшгүй ажиллагаа гэж байдаг. Хуулийн зөрчил байхгүй.
