Засгийн газрын ээлжит хуралдаанаас гарсан шийдвэрүүдийн талаар танилцууллаа. Энэ үеэр Засгийн газрын хэрэг эрхлэх газрын дарга “Хөтөл” цементийн үйлдвэрийн талаар мэдээлэл өглөө.
Засгийн газрын хэрэг эрхлэх газрын дарга Ц.Нямдорж: Хөтөл цементийн үйлдвэрийг 2011 онд 10 жилийн хугацаатай концессын гэрээгээр “Бэйзмент” ХХК-д шилжүүлсэн. Гэрээний хугацаа нь 2021 онд дуусах байсан. Гэтэл 2015 онд Хөтөл цемент, шохойн үйлдвэрийг өртэй нь хамт хувьчил гэдэг шийдвэр гарч, “Бэйзмент” ХХК хувьчилсан. Хувьчлагдсаны дараа “Бэйзмент” ХХК гэдэг ганц хүнтэй компани татан буугдаж, “Хөтөл” гэдэг нэр авсан.
Хөтөл гэдэг нэрийг өмнө нь, 2008 онд нэг хүн аваад хадгалчихсан байсан. Хувьчлагдсаны дараа “Бэйзмент” ХХК-г “Хөтөл” болгож өөрчилсөн гэсэн үг. Хувьчилж авсан хүн нь нас барсан. Тухайн хүний өв залгамжлагчид нь Хөтөлийг авахаас татгалзсан. Ийнхүү өнөөдөр Хөтөл бараг эзэнгүй шахуу компани болж хувираад байна.
Хуулийн байгууллага энэ асуудлыг шалгаж байгаа. Хууль зөрчиж хувьчлал явагдсан. Хувьчлалын дараа гэрээний үүргээ биелүүлээгүй. Тиймээс Хөтөлийн цемент, шохойн үйлдвэрийг хувьчилсан шийдвэрийг хүчингүй болго гэдэг санал ирсэн. Энэ дагуу санал боловсруулж, яамуудаас санал авсны үндсэн дээр 2015 онд Хөтөлийн цемент, шохойн үйлдвэрийг хувьчлах Засгийн газрын тогтоолыг цуцлах шийдвэр гаргалаа.
Одоо төрийн өмчийн хороо хуралдаж, Засгийн газрын шийдвэрийг давхар хүчингүй болгоно. Хувьчлал хүчингүй болсны дараа уг компанийн цаашдын хувь заяаг төрийн өмчийн хороо авч үзнэ.
Уг компани өмнө нь 50 сая гаруй ам.долларын зээлтэй байсан. Хөгжлийн банкнаас авсан 61 сая ам.долларын зээлээ Худалдаа хөгжлийн банк болон гаднаас авсан уг 50 сая ам.долларын зээлийн төлбөрт шилжүүлээд дууссан.
Шийдвэр эцэслэн гарсны дараа Хөгжлийн банкны өрийг барагдуулах асуудал яригдана. Хөтөлийн цемент, шохойн үйлдвэрийн хувьчлал бүгд яг “Эрдэнэт”-ийн 49 хувийн хувьчлалын загвараар явсан. Дарханы төмөрлөгийн үйлдвэрийг 2014 онд мөн иймэрхүү байдлаар менежментийн хувьчлалаар өгсөн. Араас нь, 2015 онд Хөтөл, 2016 онд “Эрдэнэт”-ийн 49 хувь муу гараар орсон. АТГ эдгээр хэргүүдийг бүгдийг нь шалгаж, прокурор хянаж байгаа.
Шулуухан хэлэхэд, би хувьдаа хуулийн байгууллагууд сая нэр дурдсан компаниудын хувьчлалын асуудал дээр их удаан ажиллаж байгаа гэдэг дүгнэлттэй байгаа. Энэ талаар холбогдох газруудтай олон удаа ярьсан гэлээ.
