Ерөнхийлөгчийн Тамгын газрын дарга З.Энхболд АТГ-т гэрчийн мэдүүлэг өгчээ. Ерөнхий сайд асан Ч.Сайханбилэг Эрдэнэт үйлдвэрийн 49 хувийг хувьд шилжүүлэхдээ тухайн үеийн Ерөнхийлөгч болох УИХ-ын дарга асуудлыг мэдэж байсан гэж мэдүүлжээ. Энэ дагуу АТГ-аас З.Энхболд, Ц.Элбэгдорж нараас мэдүүлэг авахаар дуудсан байна.
Энэ талаар З.Энхболд “Эрх мэдлээ хэтрүүлж, УИХ-д мэдэгдэлгүйгээр Эрдэнэтийн 49 хувийг хувьд шилжүүлсэн асуудалдаа намайг хань татаж байгаа юм байна. Гэвч ийм зүйл байхгүй. УИХ-д мэдэгдэлгүй авсан нь буруу. Хуулийн дагуу энэ асуудлыг шалгах ёстой гэж гурван жилийн өмнө хэлж байсан байр суурь минь одоо ч хэвээрээ байгаа. Энэ асуудлаар Ерөнхийлөгч асан Ц.Элбэгдоржоос мэдүүлэг авах шаардлагатай байгаа юм байна. Ирж мэдүүлгээ өгөөрэй.
Энэ асуудлыг Ц.Элбэгдорж мэдэхийн цаагуур мэдэж байсан. Ч.Сайханбилэгт нөлөөлж байсныг сүүлийн гурван жилд хэлж ярьсан бүгдээс нь ойлгомжтой байгаа. Тиймээс эртхэн ирж мэдүүлгээ өгсөн нь дээр байх.
Ер нь Эрдэнэтийн 49 хувь Монголдоо ирэх нь зөв.
Харин улс нь авах уу, хувийн компани авах уу гэдгийг УИХ тухайн үед шийдвэрлэх ёстой байсан. Энэ зарчмаар одоогийн УИХ улсдаа авья гэдэг шийдвэр гаргасан байдаг. Тэгэхээр ямарч мөнгөтэй компани байж болно. Юу ч худалдаж авч болно. Гэхдээ бүх асуудал хуулийн дагуу байх учиртай. Монгол Улсын эдлэх ёстой давуу эрхийг тухайн үед Ч.Сайханбилэг дур мэдэж эдлүүлээгүйгээс болж одоо буруутаад байгаа болохоос зарсан ОХУ-д бурууг өгөх арга алга.
Худалдаж авсан компани эх үүсвэрээ хуулийн дагуу бүрдүүлсэн бол мөн л бурууг өгөх аргагүй. Тиймээс энэ хэргийн учрыг хуулийн байгууллага олох гээд ажиллаж байгаа юм байна. Ажилд нь саад бололгүйгээр хурдан шуурхай шийдвэрлүүлье” гэж цахим хуудсаар дамжуулан мэдэгдлээ.
Ерөнхийлөгч асан Ц.Элбэгдоржийн хувьд “Хууль дуудвал гутлаа тослоод, зангиагаа зүүгээд очно” гэж ярьдаг хүн. Тэгвэл АТГ түүнийг дуудаж байна. Дан Эрдэнэт үйлдвэрийн асуудал бус Тавантолгойн асуудлаар ч Ц.Элбэгдоржоос тайлбар авах шаардлага гараад байгаа. Тиймээс гутлаа тослоод ирэх цаг чинь болжээ, Ц.Элбэгдорж оо.
