Б.Хурц нарт холбогдох хэргийг шүүхээр хэлэлцэж байна

С.Зоригийн амь настай холбоотой хэргийг шалган мөрдөх явцад Б.Содномдаржаа, Т.Чимгээ нарыг эрүүдэн шүүж, хэргийг хүчээр хүлээлгэсэн гэх хэрэгт холбогдуулан ТЕГ-ын дарга асан Б.Хурц нарын есөн хүнийг шалгаж байгаа билээ. Уг хэргийг шүүхэд шилжүүлээд байгаа бөгөөд өнөөдөр Төв аймагт урьдчилсан хэлэлцүүлэг хийгдэхээр товлогджээ.
Б.Хурцыг өнгөрөгч тавдугаар сард урьдчилан хорих 0461-р ангид саатуулан хорьсон бөгөөд нотлох баримт хангалтгүй гэх шалтгаанаар Чингэлтэй дүүргийн Эрүүгийн хэргийн анхан шатны шүүхээс түүнийг сулласан юм.
Энэ удаагийн хурлаар шүүгдэгч Б.Хурц нарын есөн хүнийг хуучин Эрүүгийн хуулийн 133.1, 251.1-д зааснаар яллах дүгнэлттэй шүүхэд шилжүүлээд байгаа юм.
Тухайн зүйл ангиуд нь,
133 дугаар зүйл. Гүйцэтгэх ажлын тухай хууль тогтоомж зөрчих
133.1.Гүйцэтгэх ажлын тухай хууль тогтоомжоор хориглосон үйл ажиллагаа явуулсан бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ.
251 дүгээр зүйл. Эрүү шүүлт тулгах
251.1.Хэрэг бүртгэгч, мөрдөн байцаагч хүч хэрэглэж буюу хүч хэрэглэхээр заналхийлэх, тарчилган зовоох, тохуурхан даажигнах, хуурч мэхлэх зэрэг хууль бус арга хэрэглэж мэдүүлэг өгөхийг албадан эрүү шүүлт тулгасан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасч таван жил хүртэл хугацаагаар хорих ял шийтгэнэ гэж заажээ.
Энэхүү хэрэгт ТЕГ-ын дарга асан Б.Хурцаас гадна Улсын Ерөнхий прокурорын орлогч асан Г.Эрдэнэбат, ТЕГ-ын мөрдөгч О.Бархасбадь, Ж.Мөнхгал, С.Баяр, Ү.Отгонбаяр, С.Эрдэнэбат, ШШГЕГ-ын ажилтан Э.Өлзийбаяр, О.Бямбажав нарын нэрс холбогджээ.