Инженер хангамж, нийтийн үйлчилгээний байгууллагууд зам талбай, шүүрт худгийг цэвэрлэж байна

 Нийслэлийн хэмжээнд 2016  оны 07 дугаар сарын 28-ны өдөр хүчтэй түр зуурын аадар борооны улмаас хотын зүүн хэсэг буюу Баянзүрх дүүрэг бүхэлдээ, Сүхбаатар, Чингэлтэй, Баянгол дүүргийн хойд хэсэг их хэмжээний усанд автсан.

Хотын Ерөнхий менежер Т.Гантөмөр, Улаанбаатар хотын Захирагчийн ажлын албаны харьяа инженер хангамж, нийтийн үйлчилгээний байгууллагууд, Нийслэлийн онцгой байдлын газартай хамтран цаг алдалгүй газар дээр нь очиж шөнийн турш ажилласан.  Нийслэлийн Засаг дарга С.Батболдод газар дээр нь очиж нөхцөл байдалтай  танилцсан. Үерийн ус доод давхарын зарим байгууллагуудын ханыг хүчтэй цөмлөн урсан орж ирсэн байлаа.

Үерт Баянзүрх дүүргийн З-р хороо Чингис зочид буудлын зүүн талын автозам 300м, Бөхийн өргөөний урд талын хороолол дундах автозам 250м, Нарны гүүрний зүүн талын автозам 150м, \”Буян”ХХК-ний зүүн талын автозамуудад ус ихээр нэмэгдсэний улмаас иргэдийн автомашин усанд суух, хөвөх, орон сууцны орц болон газар доорхи давхаруудад ус их орсон хүндрэлтэй нөхцөл байдал үүссэн.

Ус сувгийн удирдах газрын 18 машин, 31 албан хаагч, Нийтийн үйлчилгээний Улаанбаатар нэгтгэлийн  10 ажилтан, 2 портер, 2 ус соруулах машины бүрэлдхүүнтэйгээр ажиллаж Токио, Энхтайваны гүүрийн зүүн талын нүхэн гарц, автозамын гудамжинд тогтсон усыг мотор гономоор соруулсан. Нийслэлийн Онцгой байдлын газар 12 техник, 72 хүний бүрэлдэхүүнтэй ажилласан. Улаанбаатар хотын Шуурхай удирдлага зохицуулалтын төвийн бүрэлдэхүүн байгууллагуудаас нийт 18 техник хүн хүч гарч Баянзүрх дүүрэг 13-р хорооллын дунд зам, Токиогийн гудамж, Дарь-эхийн 2 дугаар хорооны айлуудын хашаанд тогтсон нийт 300тн усыг соруулсан.

 \”Улаанбаатар Цахилгаан түгээх” ТӨХК-ний 12 бригад Баянзүрх дүүргийн 7 дугаар хороо 38А, Б байр, Баянзүрх дүүргийн 5 дугаар хороо Орон сууц, нийтийн аж ахуйн удирдах газар Хэрэглэгчдэд үйлчлэх төв-1-ийн харъяа Экогийн 101-106 дугаар байруудад гарсан цахилгааны гэмтлийг засварлах ажлыг хийж байна. Нийслэлийн Онцгой байдлын газарт үерийн 59 дуудлагатай ажилласан.

Одоогийн байдлаар Нийтийн үйлчилгээний Улаанбаатар нэгтгэлийн  14 хог тээврийн машин, 228 ажилтан зам талбайг цэвэрлэж, Баянбүрдээс 7 буудал,Монелаас Шархад, Токиогийн гудамжинд 3 бобкат ажиллаж үерээс үүссэн шаврыг цэвэрлэж байна. Ус соруулах 5-15 тоннын  3 машин тогтсон усыг соруулж, 21 хүн шүүрт худгийн цэвэрлэгээг хийж байна. \”Нийтийн үйлчилгээний Улаанбаатар нэгтгэл”-ийн баруун салбарын насос станц 24 цагаар ажиллаж хөрсний усны түвшинг нэмэгдүүлэхгүй байхад анхаарч байна. Мөн Улаанбаатар хотын Захирагчийн ажлын алба, Нийслэлийн мэргэжлийн хяналтын газартай  хамтран үерт автсан газруудад ариутгал халдваргүйжүүлэлт хийж байна.