АН-ын зарим гишүүн нэгдэн, дарга С.Эрдэнийг хууль шүүхийн байгууллагаар шалгуулахаар болсноо зарлалаа. Ингэхдээ түүнийг төрийн эрхийг хууль бусаар авахыг завдсан гэх үндэслэлээр АТГ, шүүх, прокурор, ХЭҮК-т хандан шалгуулах хүсэлтийг гаргахаар санал нэгдсэн гэдгээ хэллээ.
Гэхдээ үүнээс өмнө түүнд 72 цагийн хугацаатай шаардлага хүргүүлж байгаа юм байна. Тус шаардлагад сонгуульд нэр дэвшихээр мөнгөө тушаасан 100 гаруй хүнийг нийтэд ил тодоор зарлахыг шаардлаа. Хэрвээ гурав хоногийн хугацаанд дээрх нэрсийг зарлахгүй бол хууль, шүүхийн байгууллагад хандана гэдгээ хэллээ.
Учир нь АН-ын дарга С.Эрдэнэ сонгуульд нэр дэвших квот олгохын тулд 100 саяын дэнчин төлөхийг шаардсан. Гэтэл ҮБХ-ны хурлын шийдвэр гэх нэрийдлээр горилогчдыг хоёр дахь шатны гэрээ байгуулахыг шахах нэрийдлээр нэмж 300 сая төгрөг тушаахыг үүрэг болгосон байна. Хэрвээ хоёрдугаар шатны гэрээ байгуулахгүй бол АН-аас нэр дэвших боломж олгохгүй гэдгийг хэлж байгаа аж.
АН сонгуульд өрсөлдөх эрх олгохын тулд үзэл бодлын бус мөнгөний уралдаан зарлаж байгаа учраас үүнийгээ зогсоохыг шаардаж эхэллээ.Энэ тухайд АН-ын ҮБХ-ны гишүүн Д.Мөнх-Эрдэнэ өнөөдөр хэвлэлийнхэнд хандлаа. Түүний хэлснээр тус намын дарга нь өнгөрсөн онд олон нийтэд ил тодоор зарласны дагуу горилогчдоос 100 сая төгрөг тушааснаар нэр дэвшүүлэх эрх олгох бус нэмж, 300 саяыг тушаахыг шаардаж эхэлсэн байна.
Хамгийн хачирхалтай нь нийт 400 сая төгрөг тушааж, АН-аас нэр дэвшсэн хүн ялагдлаа гэхэд яах вэ гэдгийг намын даргаасаа асуухад “Хохь чинь” хэмээн хариулж байгаа аж. Д.Мөнх-Эрдэнийн хэлснээр “АН-ын ҮБХ нь намын даргын тулгалтаар мөнгө баталдаг хурал болсон” гэлээ. Хамгийн хачирхалтай нь сонгуулийн квотыг ийнхүү их хэмжээгээр үнэлж эхэлсэнд дургүйцсэн хүмүүсийг шууд намаас хөөх шийдвэрийг хүчээр гаргаж байгаа гэнэ. Тэр ч бүү хэл, сонгуультай холбоотой асуудлаар аливаа хурал зохион байгуулахад АН-ын гишүүн бүрийг нэгбүрчлэн нэгжиж, утас сэлтийг нь хурааж аваад оруулдаг болжээ.
Түүнчлэн тус намын ҮБХ-ны гишүүдийн 49 хувь нь үзэл бодлоороо уралдах хүсэлт сонихолтой залуус байдаг 51 хувь нь С.Эрдэнийн ойр дотнын хүмүүс байдаг учраас ҮБХ-ны хурлаас хүч түрсэн шийдвэрийг гаргах болсон гэдгийг Д.Мөнх-Эрдэнэ тодотголоо. Одоогийн байдлаар тус намаын 100 гаруй гишүүн сонгуулийн дэнчин болох 100 сая төгрөгөө тушаасан бөгөөд нэмж 300 саяыг тушаахыг эсэргүүцэж байгаа юм байна. Үүнээс үүдэлтэйгээр АН сонгуульд оролцох эсэх тухай асуудал ч яригдаж эхэлсэн гэдгийг хэллээ.
Ийнхүү АН-ынхан нэр дэвшүүлэх дэнчингийн мөнгөнөөс үүдэлтэйгээр дотроо хагаралдаж эхэлсэн төдийгүй намын даргаа хууль шүүхэд өгөхдөө тулжээ.
