Сангийн сайд Ч.Хүрэлбаатар Засгийн газраас гаргах шинэ бондын талаар танилцуулж, хэвлэлийн хурал хийлээ. Монгол Улсын Засгийн газар олон улсын зах зээл дээрээс 600 сая ам.долларын бонд босгожээ. Энэхүү 600 сая ам.долларын шинэ бонд 5.125 хувийн хүүтэй бөгөөд 2026 оны дөрөвдүгээр сард эргэн төлөх юм байна. Өнөө өглөө “Номанд” бондын бүх арилжаа амжилттай хийгдэж дуусчээ.
Сангийн сайд Ч.Хүрэлбаатар: Сүүлийн гурван долоо хоногт манай яам Монголбанктай хамтран ажиллаад “Номад” бондыг олон улсын зах зээл дээр амжилттай арилжааллаа. Энэ бонд 600 сая ам.доллар бөгөөд 5.125 хүүтэй 5.5 жилийн хугацаатай. Нэгд, шинэ бонд гаргасан мөнгө нь манайд орж ирэхгүй. Өндөр хүүтэй бондыг бага хүүтэй бондоор солих ажил хийсэн. 2016 оны дөрөвдүгээр сард гаргасан 500 сая ам.долларын Мазаалай бонд 10.875, Чингис бондын нэг тэрбум ам.доллар 5.125 хувийн хүүтэй байсан. Засгийн газар 2021 онд Мазаалай, 2022 онд Чингис бонд өрийг төлөх ёстой байсан. Тэгвэл сая босгосон 600 сая ам.доллараар энэ хоёр бондыг сольж, арилжаалж авсан гэсэн үг.
2012 онд эдийн засаг 17.5 хувийн өсөлттэй, гадаад дотоодын хөрөнгө оруулалт нэмэгдсэн үед 5.125 хувийн хүүтэй Чингис бондыг гаргаж байсан.
Харин энэ жил коронавирус гарсан, эдийн засгийн өсөлт саарсан үед бага хүүтэй бонд гаргалаа. Энэ бондыг гаргаснаар хүү дээр нэлээд их хэмжээний мөнгө хэмнэж байгаа. Монгол Улс Мазаалай, Чингис, Гэрэгэ, Хуралдай гэсэн дөрвөн бондын төлбөрт 203.1 сая ам.долларыг жилийн хүүд төлдөг. “Номанд” бондоор сольж арилжаалснаар жилд 176.4 ам.доллар төлнө. Гадаад бондод төлж байгаа хүүг 70-аад тэрбум төгрөгөөр багасгаж чадсан. Хоёрт, цаг хугацаа нь тулсан төлбөрүүд байсан. Бонд төлөх хугацаа ойртоод ирэхээр бонд босгохоор хүү өсдөг. Тиймээс Засгийн газар тодорхой хэмжээний цаг хугацааны өмнө бонд гаргаж арилжаалах ёстой гэж үзсэн. 2021, 2022 онд 1.5 тэрбум ам.доллар төлөх ёстой байсан бол 900 сая ам.доллар болгож бууруулж чадсан. Энэ нь төгрөгийн ханшны тогтвортой байдлыг хангах, зээлийн хүүг бууруулахад чухал үүрэг гүйцэтгэнэ.
Бондын төлбөрүүдийг жигдэлж эхэлж байгаа. 2021 онд 500 сая, түүний дараа нэг тэрбум ам.доллар, 800, 600 сая ам.долларын зээл төлнө. Зээлийн төлбөрийн хэмжээ өөр өөр байгаа нь зах зээлийн тогтворгүй байдал үүсгдэг. Тиймээс жил бүхэн төлөх төлбөрийн хэмжээг ижил хэмжээнд аваачих нь зөв гэж үзэж байгаа.
Мэдээллийн дараа сэтгүүлчдийн асуултад хариуллаа.
-Ирэх жил төлөх Мазаалай бондын өрийг төлсөн гэсэн үг үү?
-2021 онд 500 сая ам.доллар төлөх ёстой байсан. Одоо түүнээс 130 үлдсэн гэсэн үг. 2022 онд нэг тэрбум ам.доллар төлөх ёстой байсан бол одоо 800 сая ам.доллар төлнө гэсэн үг. Жилд төлөх төлбөрүүдийн хэмжээ эрс буурсан.
-5.5 жилийн хугацаанд хүүгийн зардалд хэчнээн ам.доллар төлөх вэ?
-Жилд 30 сая ам.долларыг хүүнд төлнө. Дөрвөн бондын хүүхэд 203.1 сая ам.доллар төлдөг байсан бол одоо 176.4 сая болж үндсэндээ 26.5 сая ам.долларыг хэмнэж байгаа.
