Эрүүл мэндийн яамны өнөөдрийн хэвлэлийн хуралд ЭМЯ-ны НЭМГ-ын дарга Т.Энхзаяа оролцож мэдээлэл өглөө.
Тэрбээр “Манай улс дархлаажуулалтын 10 хоногийг 26 дахь жилдээ зохион байгуулж байна. Энэ удаагийн ээлжит 10 хоногийг “Томуугаас сэргийлье” урианд дор аравдугаар сарын 1-10-ны өдрүүдэд зохион байгуулахаар боллоо.
Манай улсын хувьд улирлын томуугийн эсрэг А хүрээний H1N1 болон H3N2, B хүрээний хэв шинжийг агуулсан гурван цэнд вакциныг БНСУ-ын Green Cross үйлдвэрээс саяхан хүлээн авсан. Маргаашаас дархлаажуулалтынхаа аяныг зохион байгуулахаар бэлтгэлээ хангаж байна.
Томуугийн эсрэг вакциныг томууд хамгийн өртөмтгий, хүндрэх эрсдэлтэй хүүхдүүдэд хийнэ. Ингэхдээ
- Нийслэлд 6 сартайгаас 9 хүртэлх насны хүүхдүүдэд
- Аймгийн төвд 2-5 насны хүүхдүүдийг үнэ төлбөргүйгээр харьяа сум, өрхийн эрүүл мэндийн төвийн дархлаажуулалтын байнгын цэгүүд болон цэцэрлэг сургууль дээр нь дархлаажуулалтын түр цэгүүдээр хийх юм.
Хүүхдүүдэд вакцин хийхийн өмнө эцэг, эх, асран хамгаалагч нарт тухайн вакцины талаарх мэдээллийг хүүхдийн байгууллагуудаар дамжуулан өгч байгаа.
Насанд хүрэгчдийн хувьд,
- Дөрвөөс дээш сартай жирэмсэн эмэгтэй,
- 65 ба түүнээс дээш насны ахмадууд,
- Архаг суужрь өвчтэй хүмүүс,
- Эрүүл мэндийн ажилтнуудад харъяа эрүүл мэндийн байгууллага болон өрхийн эрүүл мэндийн төвийн дархлаажуулалтын нэгжүүдэд вакциныг хийнэ.
Дархлаажуулалт нь халдварт өвчнөөр зөвхөн ганц хүүхдийг өвчлүүлэхгүй байх асуудал биш бөгөөд олныг хамарсан дэгдэлт, цар тахлаас нийтийн эрүүл мэндийн хамгаалахад чухал үүрэг гүйцэтгэдэг болохыг дэлхий нийтээр хүлээн зөвшөөрдөг. Дэлхийн 194 оронд бага насны хүүхдийг вакцинаар дархлаажуулж хүүхдийн өвчлөл эндэгдлийг бууруулахад үнэтэй хувь нэмэр оруулж байна. Иймд та бүхнийг хүүхдээ улирлын томуугийн эсрэг дархлаажуулалтад бүрэн хамруулж томуугийн өвчлөл, хүндрэлээс урьдчилан сэргийлэхийг уриалж байна.
Гэхдээ дан ганц вакцин нь амьсгалын замын халдварт өвчнөөс хамгаалж чадахгүй учир гараа тогтмол угааж, амны хаалт зүүж, олон хүнтэй газраар явахгүй байхыг дахин сануулъя” хэмээн хэллээ.
