БНСУ-д “COVID-19”-ийн илүү хурдан халдварладаг хувилбаруудаар дотоодод халдварласан таван тохиолдол илэрлээ гэж тус улсын Өвчинд хяналт тавих, урьдчилан сэргийлэх төв өнөөдөр мэдээлэв.
Тэдгээр тохиолдлын дөрөв нь Их Британид анх илэрсэн хувилбараар, нэг нь Өмнөд Африкт анх бүртгэгдсэн хувилбараар халдварлажээ. Ингэснээр БНСУ-д коронавирусний хувилбараар халдварласан нийт тохиолдлын тоо 39-т хүрсэн байна.
Өвчинд хяналт тавих, урьдчилан сэргийлэх төвийн мэдээлснээр, дөрвөн өвчтөн Өмнөд Гёнсан, Өмнөд Жёлла мужид гэртээ өөрийгөө тусгаарлаж байсан хамаатнуудтайгаа уулзсаны дараа халдвар авчээ.
Эрүүл мэндийн байгууллагын удирдлагууд цаашид коронавирусний хувилбараар дотоодод халдварласан тохиолдлууд нэмж бүртгэгдэж болзошгүйг анхааруулаад, өвчтөнүүдтэй ойр байсан хүмүүсийн биеийн байдлыг хянах ажиллагаагаа эрчимжүүлнэ гэдгээ мэдэгдсэн байна.
Мөн БНСУ-д вирусний хувилбарууд тархах нь цаг хугацааны асуудал болохыг Өвчинд хяналт тавих, урьдчилан сэргийлэх төвийн мэдэгдэлд дурдаад, хилийн чанадаас ирсэн хамаатнуудтайгаа уулзахгүй байхыг иргэдэд уриалжээ.
“COVID-19”-ийн илүү хурдан халдварладаг хувилбар тархвал нөхцөл байдал дахин хүндэрч болзошгүй тул БНСУ-ын эрүүл мэндийн байгууллагын мэргэжилтнүүд сонор сэрэмжтэй ажилласан хэвээр байгаа ажээ.
БНСУ Их Британид анх илэрсэн шинэ хувилбар тархахаас урьдчилан сэргийлэхийн тулд өнгөрсөн 12 дугаар сарын 23-наас тус улсаас ирэх зорчигч тээврийн нислэгийг зогсоож, хожим нь хоёрдугаар сарын 11 хүртэл сунгасан юм.
Мөн хилийн чанадаас ирсэн гадаадын иргэдээс БНСУ-д ирэхээсээ өмнө 72 цагийн дотор өгсөн коронавирусний шинжилгээний хариугаа сөрөг гарсныг батлах бичиг баримт авчрахыг шаардаж байгаа билээ.
БНСУ-д лхагва гарагт коронавирусний халдварын 433 тохиолдол шинээр илэрснээр халдвар авсан хүний нийт тоо 79311-д хүрсэн байна.
