Хэрэглээнийхээ чадлын даацыг тооцоолж сураарай

 

ЭХЗХ-ны шийдвэрээр гэр хорооллын тарифт тоолууртай хэрэглэгчдийн цахилгааны шөнө (21 – 06 цаг)-ийн тарифыг 2016 оны арваннэгдүгээр сарын 1-ээс 2017 оны гуравдугаар сарыг дуусталх хугацаанд 50 хувиар хөнгөлсөнтэй холбогдуулан цахилгаанаас үүдэх галын болон бусад болзошгүй эрсдлээс сэргийлэх зорилгоор Танд зөвлөж байна.

Хэрэглээнийхээ чадлын даацыг тооцоолж сураарай

– Ахуйн хэрэглээ (220 B)-ний тоолуур, автомат нь хамгийн дээд утгаараа 25А авах зориулалттай байдаг.Тиймээс цахилгаан хэрэгсэл бүрт байдаг техникийн үзүүлэлтийн тодорхойлолтод заагдсан даацаар хэрэглээгээ тооцож сураарай. Жишээ:

Монел брэндийн цахилгаан халаагуурын хэрэглээ 1050W гэж үзвэл

Гүйдэл =  W/Вбуюу 1050/220 = 4.7А   

W – нэг цагт хэрэглэх цахилгаан /килоВатт/

            А – нэгж хугацаанд дамжуулагчаар дамжих гүйдэл /Ампер/

            В – хувьсах хүчдэл /Вольт/

Халаагуураас гадна та бусад байнга ашиглагддаг цахилгаан хэрэгслийнхээ нийт хэрэглээг тооцож үзсэнээр автоматынхаа хүлээн авч чадах дээд түвшинд нь хүрэхээс сэргийлж чадна. Танд дөхөм болгох үүднээс зарим цахилгаан барааны хэрэглээг ойролцоо утгаар гаргаж үзүүлье.

Хөргөгч – 1500W          

Халуун тогоо – 1500W(Товчлуур бүр)

Зурагт, компьютер -900W      

– Халаагуур, зурагт, хөгжим, ус буцалгагч, компьютер, цахилгаан болон богино долгионы зуух, халуун тогоо, утасны цэнэглэгч зэргийг ашиглаагүй үедээ тэжээлээс салгаж байх нь зүйтэй.

Аюулгүй цахилгаан халаагуур сонгоорой

– Ахуйн хэрэглээ (220B)-нд тохирсон халаагуур авахыг хүсвэл 5 кВт-аас бага чадал шаардагдахыг сонгоорой. Үүүнээс дээш чадалтай халаагуурыг залгах нь автомат дахин дахин унах, эвдрэх цаашилбал тоолуур шатах нөхцөлийг үүсгэнэ. Хэрвээ та 5 кВт-аас илүү чадал шаардсан халаагуур авахыг хүсвэл УБЦТС ТӨХК-аас техникийн нөхцөл авч, тохирсон хүчдэлд холбогдох боломжтой.

– Гар аргаар хийсэн халаагуур, бойлер нь хүний амь нас, эд хөрөнгөд халтай олон сөрөг үр дагаврыг дагуулж байдаг. Шинээр тавьсан үедээ ямар ч аюулгүй мэт харагдавч эдэлгээний явцад чийг авах, утас нь ил гарах, бүрээс нь урагдах, хүүхэд оролдох, санамсаргүй байдлаар аль нэг утасны холболт тасрах зэрэгт нэн аюултай нөхцөлийг үүсгэдэг. Тиймээс үйлдвэрийн баталгаа, гэрчилгээтэй, дулааны шаталсан болон хугацааны тохируулгатай, ахуйн зориулаллтай халаагуур худалдаж авахыг зөвлөе.

Цахилгаан дамжуулагч тоноглол, оруулгын утасны аюулгүй байдлыг хангаарай

– Ахуйн хэрэглээнд оруулгын кабель утсыг сонгохдоо зэс хийцтэй бол 2 х 4, хөнгөн цагаан хийцтэй бол 2 х 6-аас дээш голчтой нь тохиромжтой байдаг.

–  Цахилгааны утасны ачаалал хэтэрч халах, шатах эрсдэл үүсэхээс сэргийлэн өндөр чадалтай төхөөрөмж залгахаасаа өмнө оруулгын кабель утсаа шалгаж байгаарай. Цахилгааны утасны залгаан дээр ихэвчлэн халалт үүсдэг.

– Эвдрэл, гэмтэлтэй залгуур, унтраалга, олон залгаастай утас зэргийг даруй шинэчлэх нь аливаа болзошгүй эрсдлийг зайлуулна.

–  Цахилгаан дамжиж буй утсыг унь, тооно, ор, ханын толгойд ороож болохгүй.

– Дамартай ороолттой урт залгуурыг ашиглах тохиолдолд утсыг бүрэн хөвж, эрчлээг нь арилгасны дараа залгаж ашиглаарай.

– Хөнгөнцагаан, зэс хийцтэй, мөн ижил бус хөндлөн огтлол (бүдүүн, нарийн)-той дамжуулагч утсыг хооронд нь холбож болохгүй.

! Цахилгаан дамжуулах утасны тусгаарлагч, унтраалга солих, залгуурын холболт чангалах шаардлагатай бол холбогдох мэргэжлийн байгууллагууд (ОСНАА-н Хэрэглэгчдэд үйлчлэх төв, СӨХ, Мэргэжлийн компани)-д хандаарай.

! Богино залгаа үүссэн болон хэт ачааллын үед тоолуурын щит дэх автомат хамгаалалтаар унасан тохиолдолд УБЦТС ТӨХК-ийн Хэрэглэгчдэд үйлчлэх төвд биеэр болон 70047004 утсаар дуудлага өгөөрэй. Дуудлагыг ажлын цагуудад барагдуулдаг тул Та цахилгаан хэрэглээгээ зохистой түвшинд тохируулж ачааллуулахгүйгээр автомат унахаас урьдчилан сэргийлэх боломжтой. Эсвэл гэр, сууц дотроо тоолуурын щитэд байгаагаас бага амперийн автомат суурилуулснаар ачааллаа хэтрүүлэн унагасан тохиолдолд өөрөө залгах боломж бүрдэнэ. 

УЛААНБААТАР ЦАХИЛГААН ТҮГЭЭХ СҮЛЖЭЭ ТӨРИЙН ӨМЧИТ ХУВЬЦААТ КОМПАНИ