Улсын Бүртгэлийн Ерөнхий Газар (УБЕГ)-аас “Иргэний шилжилт хөдөлгөөн”-ий бүртгэлийг цахимаар бүртгэх үйлчилгээг өнөөдрөөс (2022.06.16) И-Монголиа нэгдсэн системд нэвтрүүлсэн талаар мэдээллээ. Манай улсад жилд 210,000-250,000 орчим хүн шилжилт хөдөлгөөн хийдэг гэсэн статистик бий. Шилжилт хөдөлгөөний бүртгэл нь нийт үйлчилгээ дотроос иргэдэд хамгийн их хамааралтай үйлчилгээ гэдгийг УБЕГ-ын дарга Д.Дэлгэрсайхан хэллээ.
Мөн тэрбээр “Сүүлийн жилүүдэд бид үйлчилгээгээ цахимжуулах ажлыг эрчимтэй хийж байгаа. Тиймээс улсын бүртгэлийн цахим үйлчилгээг өргөтгөх, цахим үндэстэн болох үйл ажиллагааны хүрээнд И-Монголиа системд олон үйлчилгээгээ оруулсан. Тодруулбал, УБЕГ-ын 22 төрлийн лавлагаа, 55 төрлийн үйлчилгээ И-Монголиа нэгдсэн системд ороод байна. Үүнтэй холбоотойгоор 2022 оны эхний улирлын байдлаар иргэдээс шууд гарч байгаа зардал 30 тэрбум төгрөгөөр хэмнэгдсэн тооцоолол гарч байгаа.
Өмнө нь шилжилт хөдөлгөөн хийхэд шаардлагагүй маш олон баримтыг хувь иргэнээс нэхдэг байсан. Улмаар Иргэний улсын бүртгэлийн тухай хууль 2018 онд шинэчлэгдэн батлагдсанаар нэхэж байгаа бичиг баримтын тоог хоёр дахин багасгасан үзүүлэлттэй байгаа юм.
Түүнчлэн нэг газраас хасалт хийлгэж нөгөө газраа бүртгүүлдэг зохицуулалттай байсан. Харин одоо зөвхөн шилжиж очиж байгаа талдаа бүртгэлээ хийлгэдэг зохицуулалттай явж байгаа.
Иргэний шилжих бүртгэлийг цахимаар бүртгэснээр оршин сууж байгаа хаягийн баталгааг бүртгэлийн ажилтнууд цахим системээс шалгах бололцоогоор хангаж байна. Дээрээс нь иргэд ямар нэгэн зардал чирэгдэлгүй үйлчилгээг авах бололцоотой” хэмээн хэллээ.
Олон Улсын Шилжилт Хөдөлгөөний Байгууллагын Монгол дахь салбарын Хөтөлбөрийн менежер Виктор Лутенко “Үндэсний Статистикийн Хорооноос 2020 онд гаргасан судалгаагаар Монгол Улсын нийт иргэдийн 25 хувь нь амьдралдаа заавал шилжилт хөдөлгөөн хийдэг байна. Үүнтэй зэрэгцээд иргэдийн зүгээс бүртгэлийн үйлчилгээ ойлгомжгүй гэж хариулсан байна. Тиймээс иргэний шилжилт хөдөлгөөний цахим бүртгэл нь үйлчилгээ авах процессыг илүү хялбаршуулах боломжтой.
Иргэний шилжилт хөдөлгөөнийг цахимжуулах нь гол арга зам мөн. Гэхдээ бусад дагалдах арга хэмжээг зайлшгүй авч хэрэгжүүлэх ёстой. Энэ төрлийн үйлчилгээг иргэдэд ойлгуулах нь гол анхаарах зүйл” гэлээ.
