“Чингис хаан” хаад, язгууртны музейн нээлтийн ёслолтой холбогдуулсан хэвлэлийн бага хурал боллоо.
Маргааш 11:00 цагт буюу морин цагт “Чингис хаан” музейн нээлтийн ёслол болно. Музейн нээлт Чингис хаан мэндэлсний 860 жил буюу тэгш ойтой давхардаж буйгаараа онцлогтой. Мөн нээлтийн ёслолд зориулж төрийн есөн хөлт цагаан тугийг “Чингис хаан” хаад, язгууртны музейд залах Монгол Улсын Ерөнхийлөгчийн зарлиг гарсныг мэдээллийн эхэнд Ерөнхийлөгчийн Тамгын Газрын дарга Я.Содбаатар хэллээ.
“ЧИНГИС ХААН” МУЗЕЙД ДЭЛГЭГДСЭН ҮЗМЭРИЙН 93 ХУВЬ НЬ ОРИГИНАЛ
Мөн тэрбээр “Хамгийн гол асуудал нь музейн үндсэн үзэл баримтлалыг тодорхойлох, үзэл баримтлалын дагуу үзүүлэлт дэглэлтийг бүрдүүлэх, бүрдсэн үзүүлэг дэглэлтийн үзмэрээр музейг дэглэж, зохион байгуулах үе шаттай ажил явагдаж байна.
Нөгөө талаас музейн боловсон хүчнийг бүрдүүлэх, сан хөмрөгийг баяжуулах ажлууд явагдаж байгаа.
“Чингис хаан” музейн хамгийн гол онцлог нь Монголын эртний төрт улс (Хүннү, Сяньби, Жужан), эртний нүүдэлчдийн төрт улс (Түрэг, Уйгур, Хятан), Их Монгол Улс, Монголын Их эзэнт улс, Чингис хааны угсааны хаад, язгууртны (XIV-XX зууны эхэн үе), Дэлхий дахин ба Монголчуудын танхим (Монгол бахархлын танхим), Их хааны хүндэтгэлийн өргөө гэсэн байнгын үзмэрийг нийтэд толилуулах юм.
Чингис хааны угсааныхны хаад, язгууртнуудын түүхийг харуулж, 20 дугаар зууны эхэнд Чингисийн угсааны алтан ургийн ноёд өнөөгийн Монгол Улсыг хэрхэн бидэнд үлдээсэн түүхийг бүрэн цогцоор нь харуулсан онцлогтой.
Чингис хаан музейд юу тавих бол гэж санаа зовох шаардлагагүй. Хангалттай бүх цаг үеийн түүхийг харуулсан дурсгал тавигдсан. Чингис хаан музей нь үзмэр үзүүлэг дэглэлтийнхээ хувьд өндөр хувьтай, олон улсын стандарт шаардлагад нийцсэн.
Монголын түүхчид, эрдэмтэн судлаачид, археологичид, уран бүтээлчид хамтран бүтээж буй музей юм. Мөн “Чингис хаан” хаад, язгууртны музей бол нүүдэлчдийн түүхийг цогцоор нь харуулсан Ази тивд буй том хэмжээний музейд тооцогдоно. Өөрөөр хэлбэл, 2,000 жилийн хаад, язгууртны түүхийг харуулсан төрт ёсны музей билээ” гэв.
14 улсаас Монгол Улс болон Монголын эзэнт гүрэнтэй холбоотой зайлшгүй шаардагдах дурсгалуудыг албан ёсны зөвшөөрөлтэй А хуулбарыг бүгдийг нь авсан. Тухайлбал Эрмитаж музейд хадгалагдаж буй Чингисийн чулууны бичгийн хуулбар бий.
Энгийн тооцооллоор жилд хүн амынхаа 5 хувьд үйлчлэх хүчин чадалтай гэж харвал 4.5 тэрбум төгрөг бүхий орлого олно гэж энгийнээр тооцсон” гэв.
