Монгол Улс 2023-2026 онд ДНБ-тэйгээ тэнцэх буюу 13.3 тэрбум ам.долларын гадаад өр төлөх хуваарьтай. Тухайлбал, 2023 онд Хөгжлийн банкны 500 сая ам.долларын Евро бонд, Засгийн газрын баталгаатай босгосон 30 тэрбум иений Самурай бондын өрийг төлнө. Монгол Улсын Засгийн газар ирэх онд төлөх байсан 500 сая ам.долларын Гэрэгэ бондыг дахин санхүүжүүлсэн учраас ирэх жилдээ гадаад эргэн төлөлт дээр ирэх ачаалал багасаж буй. Гэхдээ Хөгжлийн банк зээлээ төлж чадахгүй бол улсын зээлжих зэрэглэлд сөргөөр нөлөөлнө.
Хувийн хэвшлийнхээс ирэх онд Оюу толгой ХХК 800 сая, Шангри-Ла ХХК 312 сая ам.долларын зээлийг төлөх хуваарьтай.
Монголбанкны хувьд нийт гадаад өр 2.6 тэрбум ам.доллар байгаагийн 1.8 тэрбум ам.доллар нь БНХАУ-ын Ардын банктай 2011 оноос хойш байгуулж ирсэн юанийн своп хэлцлийн өр төлбөр эзэлж буй. Энэхүү своп хэлцлийн өр төлбөрийг барагдуулах хугацааг гурван удаа сунгасан. Ингэхдээ 2014 оноос хойш гурав, гурван жилээр сунгасан бөгөөд хамгийн сүүлд 2020 оны долдугаар сард талууд гэрээгээ шинэчлэн сунгасан юм. Хуваарь ёсоор 2023 оны долдугаар сард Монголбанк Хятадын Ардын банкинд 15 тэрбум юань буюу өнөөгийн ханшаар 1.8 тэрбум ам.долларын өр төлбөрийг барагдуулах учиртай.
Гэвч Монгол Улсын эдийн засгийн өнөөгийн нөхцөл байдал, гадаад валютын албан нөөц буурсан зэрэг үзүүлэлтээ харахад энэ өрийг Монголбанк ирэх онд барагдуулах боломж тун хомс. Энэ ч үүднээс своп хэлцлийн хугацааг дахин сунгах асуудал өнгөрсөн хавраас яригдах болсон. Ирэх өдрүүдэд Монгол Улсын Ерөнхийлөгч У.Хүрэлсүхийн БНХАУ-д хийх төрийн айлчлалаар уг асуудлыг талууд хөндөж, урьдчилсан тохироонд хүрэх магадлал өндөр юм.
Сануулахад, Монголбанк БНХАУ-ын Ардын банк хооронд анх 2011 онд гурван жилийн хугацаатай, 5 тэрбум юанийн дүн бүхий своп хэлцлийг байгуулсан байдаг. Энэхүү хэлцлийн дүнг 2012 онд дахин 5 тэрбум юаниар нэмэгдүүлж, 10 тэрбум юань болгосон. Улмаар 2014 онд дахин гурван жилээр сунгаж, дүнгийн хэмжээг 5 тэрбум юаниар нэмэгдүүлсэн билээ.
