Агаарын бохирдлыг бууруулах Үндэсний хорооны Ажлын албаны дарга С.Даваасүрэн, ахлах мэргэжилтэн Г.Намхайдорж нар өчигдөр/2025.09.15/-нд Тавантолгой Түлш ХХК-ийн зүүн бүсийн үйлдвэрт ажиллалаа.
Төв аймгийн Сэргэлэн сумын нутагт байрладаг тус үйлдвэр өнгөрсөн жилийн үлдэгдэл мидлингээр 40 000 тонн шахмал түлш үйлдвэрлэхээр төлөвлөснөөс гадна БНХАУ-аас импортлох 300 мянган тонн хагас коксон түлшийг савлан, нийслэлчүүдэд түгээх юм.
Одоогоор хоногт 600-700 тонн мидлингийн шахмал түлш үйлдвэрлэж, 38 000 тонн нөөц бүрдүүлжээ. Мөн үйлдвэрийн савлагааны шугамуудыг нэмэгдүүлж, БНХАУ-аас нийлүүлэх хагас коксон түлшийг хүлээн авч, савлахад бэлэн болсон аж.
Түүнчлэн түлшний нийлүүлэлтийг хянаж, хэрэглэгчдийн хэрэглээг хялбар болгох үүднээс “ХОТУЛА” аппликэйшныг хэрэглээнд нэвтрүүлж, БНХАУ-аас нийлүүлэх хагас коксон түлшний савлагааг шинэчилж буй.
Энэ талаар Ажлын албаны дарга С.Даваасүрэн “Хагас коксон түлшний галлагааны зааврыг хүн бүрт хүргэх нь чухал. Брошур тарааж, зурагтаар зөвлөмж цацах нь хүртээмжгүй байж болзошгүй. Тиймээс гал түлэх хүн бүрд хүргэхийн тулд асаах зааврыг түлшний уутанд хэвлэж өгвөл илүү хүртээмжтэй, оновчтой шийдэл болно” гэв.
Хагас коксон түлш нь 25 кг-аар савлагдаж, шатдаг цаасан материалаар хийгдсэн ууттай байх аж. Мөн түлш хэрэглэгчдэд үйлчлэх төвтэй нягт уялдаатай ажиллаж, угаар мэдрэгчийн хүртээмж, найдвартай ажиллагааг хангахад анхаарахыг зөвлөлөө.
Эх сурвалж: Агаарын бохирдлыг бууруулах үндэсний хороо
