\”Ном бол өрөөсөн хайрын эзэн. Шүүгээндээ хийгээд мартчихвал тэд тоосонд дарагдсаар чамайг насан туршдаа хүлээнэ. Харин тэднийг нээж уншихын цагт хэзээд хайраа түгээхэд бэлэн байна.” – John Green![\"\"](http://undesten.mn/uploads/posts/2015-10/1445568475_1io56itvdm7tfadqh7q5lqe0kg.jpg "\\"\\"")
Хэзээ хамгийн сүүлд уран зохиолын ном уншсанаа санаж байна уу? Эргүүлж тойруулан харах биш, үнэхээр шимтэж уншсанаа? Facebook, Instagram, Snapchat хамаг цагийг маань өөртөө өмчилчихөөд ном уншиж суух зав бидэнд гарахаа больчихож. Уншсан ч өөрийнхөө ажилд хэрэгтэйд тооцсон хувь хүний хөгжлийн номнуудад цаг гаргах нь илүү болжээ. Хуудсууд дунд нь ухаанаа алдаж, хичээл ном, хоол цайгаа ч умартан дараа нь юу болох бол оо гэхээс тэсгэл алдан уншдаг байсан цагаа эргүүлэн авчирч, уран зохиолын номонд ахин цаг гаргах ёстой 7 шалтгааныг чинь нэрлэж байна.
Бүтээлчээр сэтгэх хүрээг чинь өргөжүүлнэ
Урлаг бидний төсөөлөн бодох чадварыг ургуулан усалдаг. Уран зохиол нь бидэнд хүлээн авсан зүйлээ тархиндаа ахин боловсруулах зайг гаргаж өгдөг учраас урлагийн давтагдашгүй чухал төрөл юм. Өөрөөр хэлбэл, уран зохиол бидэнд явах зүгийг маань зааж өгсөн ч, явах замаа бид өөрсдөө тархиндаа зурж дүрсэлдэг гэсэн үг. Бүтээлчээр сэтгэх чадвараа өргөжүүлснээр ажил дээрээ ч ямар ч төслийг дараагийн шат хүртэл нь ахиулж чадна гэсэн үг.
Өөрийнхөө \”баатар”-ыг олох
Ихэнх зохиолд маш олон саад бэрхшээлийг даван туулж, муу талын эсрэг зогссоор \”баатар” болдог нэг дүр бий. Тэр баатрын оронд өөрсдийгөө тавин бодож байхдаа бид түүнтэй цуг унаж, түүнтэй цуг сэхэж байдаг. 2011 онд нийтлэгдсэн нэгэн сэтгэл зүйн судалгаан дээр хүмүүс хэн нэгний туршлагын талаар унших явцад тархины мэдрэлийн хэсэгт тэрхүү туршлага нь тухайн хүн өөрөө тэр зүйлийг туулсан юм шигээр буудаг гэдэг нь нотлогджээ. Өөрөөр хэлбэл, бид сайхан зохиолыг уншиж дуусахдаа өөрөө өөртөө \”баатар” болчихдог юм.
Бусдыг ойлгоход тусална
Удирдагч, бизнес эрхлэгчдэд хамгийн хэрэгтэй чанаруудын нэг бол \”бусдыг ойлгох чадвар” юм. 2013 онд Science сэтгүүлд гарсан нэгэн нийтлэл дээр уран зохиолын ном унших нь уншигчдын нийгмийн үзэгдлийг хүлээж авах, бусдыг ойлгох чадварыг нэмэгдүүлдэг гэдгийг нотолж бичжээ. Бид ном уншиж байхдаа зохиолын дүрд тохиолдож буй үйл явдалд цэвэр өөрийнхөө үнэлэмжээр хандаж чаддаг. Сэтгэл хөдлөлөө жинхэнээр нь гаргадаг гэсэн үг. Энэхүү сэтгэл хөдлөлийн илэрхийлэл нь алдагдаж арилалгүй, хадгалагдан үлдсэнээр өдөр тутмын амьдралд маань эерэг нөлөөгөө үзүүлдэг ажээ. Уран зохиол уншсанаар бид олон янзын хүмүүсийн оронд өөрийгөө тавьж, дотоод бодлыг нь ойлгож чаддаг болдог.
Өөрийгөө олоход тусална
Нийгмийн үл үзэгдэх дарамтын нөлөөгөөр бид жинхэнэ сэтгэл хөдлөлөө тэр чигт нь ил гаргаад байдаггүй. Харин ном уншиж байхдаа бид өөрийнхөө үнэн дүр, тэр ч бүү хэл хэрэгцээ шаардлагынхаа тухай олж нээдэг. Уншиж байхдаа бид амьдралын өмнө өдийг хүртэл юуг үнэн гэж бодсоор ирсэн, яг тэр л төрхөөрөө харж байдаг. Үүнтэйгээ олон дахин нүүр тулсанаар бид өөрийнхөө мөн чанар, юуг хамгийн ихээр чухалчилж үздэгээ мэдэж аван цаашид тохиолдох олон сонголтонд ухаалаг хандахад тусална.
Шинэ саад бэрхшээлд хэрхэн хандахад суралцана
Зохиолын дүрүүд аливаа саад бэрхшээлийг туулж байхдаа, тэрхүү туршлагаа бидэнтэй цаг тухай бүрт нь хуваалцаж байдаг. Дараа нь ижил асуудал тулгарахад бид аль хэдийнэ яахаа мэднэ гэсэн үг. Пауло Коелогийн алдарт бүтээл \”Алхимич”-ийн нөлөөгөөр олон хүн амьдрал хэмээх адал явдалт аялалд хандах хандлагаа шинэчилсэн байдаг. Зохиолын алдартай эшлэлээс: \”Бид хайрлах үедээ одооныхоосоо илүү сайжрах гэж хичээдэг. Харин сайжрах гэж хичээх үед, эргэн тойрон маань ч дагаад сайжирдаг юм”
Дээд зэргийн анхаарал төвлөрөх чадвартай болно
Суугаад хагас цагийн турш нэг ажилдаа төвлөрч чаддаг бол, тэр хүн анхаарал сайтайд тооцогдоно. Гэхдээ хийж байгаа ажлаа \”урлагийн бүтээл”-ийн түвшинд хийхийн тулд маш анхааралтай байх хэрэгтэй. Анхаарал төвлөрүүлэх чадварыг сайжруулах олон янзын арга байдаг ч үр дүнтэй, утга учиртай байх нь ховор. Тэдгээрийн оронд уншихаас эхлэх хэрэгтэй. Хэрвээ чи уншдаг бол сошиал медиа, чат, сөрөг үйл явдал зэргийн аль нь ч чиний оюун санааг сарниаж чадахгүй.
Дотоод амар амгаланг бий болгоно
Уншиж эхлэхэд хүн хэдхэн минутын дотор тайвширдаг. 2009 оны нэгэн судалгаагаар 6 минутын турш унших нь тухайн үеийн стрессийн хэмжээг 68 хувь бууруулдаг гэдэг нь тогтоогджээ. Мөн ном уншигчид нойр сайтай, өөртөө итгэлтэй, хий бухимдалгүй байдаг. Хараагаа салгамгүй номыг уншиж байхдаа хүн өөрийнхөө санаа зовнил, стрессээс салж, зохиогчийн төсөөлөлтэй \”хөл нийлүүлэн алхаж” эхэлдэг юм байна.
Уран зохиолоос л мэдэрч болох хязгааргүй төсөөлөл, дүр зураг биднийг үргэлж хүлээж байна. Адал явдал дунд өөрийгөө \”алдах” мэдрэмжийг ахин авцгаая.
эх сурвалж: Гоолингоо
