Өнөөдөр УИХ-ын хаврын чуулган эхэлж Монгол улсын Ерөнхийлөгч Х.Баттулга УИХ-ын чуулганы нээлтэд оролцож үг хэллээ. Энэ үеэр тэрээр нэгэн хатуухан үг хэлсэн нь АТГ-ын дарга Х.Энхжаргалыг ойрын үед ажлаас нь чөлөөлөх талаар УИХ-ын даргад хандана гэсэн үг байв. Тэрээр АТГ-ын дарга Х.Энхжаргалын талаар хэлэхдээ “Би ойрын үед АТГ-ын удирдлагыг яаралтай солих асуудлаар УИХ-ын даргад хандана. Та бүхэнд энэ асуудлыг хэлэлцэхээс өөр арга байхгүй. Ажлаа хийж чадахгүй байгаа албан тушаалтныг халах хэрэгтэй. Авлигын томоохон хэргүүд шийдэгдэхгүй байна” гэсэн юм.
АТГ-ын дарга Х.Энхжаргал нь төрөөс төрсөн тэрбумтнуудийн бүлэглэлүүдийг удирдан чиглүүлдэг загалмайлсан эцэг нар гэгддэг УИХ-ын дарга М.Энхболд, Ерөнхийлөгч асан Ц.Элбэгдорж нарын ойрын хүн гэх яриа улс төрийн хүрээнд байдаг нь нууц биш бөгөөд түүнийг Ерөнхийлөгч асан Ц.Элбэгдоржийн санал болгосны дагуу 2016 оны 7 дугаар сарын 8-нд УИХ-ын чуулганы нэгдсэн хуралдаанд оролцсон гишүүдийн 88.1 хувийн саналаар Авлигатай Тэмцэх Газрын даргаар томилсон байдаг.
Харамсалтай нь тэрээр уг албан тушаалд томилогдсоноосоо хойш нэг их сүртэй ажил хийгээгүй нь үнэн бөгөөд олон түмний дунд ихээхэн шуугиан тарьсан алдарт 60 тэрбумын гэх хэрэг болон авлига албан тушаалын бусад ноцтой хэргүүдийг өнөөг хүртэл шалгаж шийдвэрлээгүй байгаа билээ.
Ямартай ч сүүлийн үед янз бүрийн хэрүүл шуугиан,баривчилгаа явуулж мөн авлигачдыг өөгшүүлж тэдний гал хамгаалагч болж байна хэмээн янз бүрээр хэлэгдэж байгаа АТГ-ын дарга Х.Энхжаргал болон тус байгууллагын бусад удирдах албан тушаалтнуудын албан тушаалдаа үлдэх эсэх нь ойрын үед шийдэгдэх төлөвтэй. Гэхдээ зарим хүмүүс түүнийг албан тушаалдаа үлдэх магадлалтай гэж үзэж байгаа ба учир нь түүнийг М.Энхболдын гарын хүн гэж үзэж байгаа ажээ.
АТГ-ын дарга Хүрэлсүхийн Энхжаргал нь 1964 онд Улаанбаатар хотод төрсөн.
1972-1982 онд Ерөнхий боловсролын сургууль, 1982-1987 онд НАХЯамны дэргэдэх Цэргийн дээд сургуулийг хуульч мэргэжлээр, 1995-1996 онд Төрийн захиргаа удирдлагын хөгжлийн институтыг Төрийн удирдлагын менежерээр тус тус дүүргэсэн.
Тэрээр Налайх дүүргийн Цагдан сэргийлэх хэлтэст өмчийн төлөөлөгч, ахлах төлөөлөгч, Эрдэнэт хотын Цагдаагийн хэлтэст Эдийн засгийн ахлах төлөөлөгч, Төв аймгийн Цагдаагийн газрын дэд дарга, дарга, Баянзүрх дүүргийн Цагдаагийн хэлтсийн дарга, Замын цагдаагийн газрын дарга, Цагдаагийн Ерөнхий Газрын Мэдээлэл технологийн төвийн даргаар ажиллаж байсан гэнэ.
