Зайсан Хилл цогцолборт нэгэн онцгой үйл явдал боллоо. Нийслэлчүүддээ болон нийт Монголын ард түмэндээ цоо шинэ ертөнцийг бий болгож, дэлхийтэй хөл нийлүүлэн алхах боломжийг олгож байгаа газар бол соёл амралтын “Зайсан Хилл цогцолбор” билээ. Энэ ондоо үйл ажиллагаагаа 100 хувь нээхээр зорин ажиллаж байгаа тус хамт олон өнгөрсөн бямба гаригт буюу энэ сарын 7-ны өдөр цогцолборынхоо 4 дүгээр давхрыг албан ёсоор нээж, ээлжит бэлгээ барьлаа.
Зайсан Хилл цогцолборын худалдааны давхрын албан ёсны нээлтэд үйлчлүүлэгч зочид олноор цугласан байлаа. Ингээд нээлтийн тууз хайчлах ёслолд Оюуны Ундраа группийн Гүйцэтгэх захирал О.Тэнүүн болон тус цогцолборын 4 дүгээр давхарт нээгдэж байгаа Stival, Remax, Lhamour дэлгүүрийн захирал, менежерүүд оролцлоо.
Тууз хайчлах ёслолын дараа Оюуны Ундраа группийн Гүйцэтгэх захирал О.Тэнүүн нээлтийн ажиллагаанд зориулж үг хэлсэн юм. Тэрээр “Юуны түрүүнд манай цогцолбороор зочилж, хүрэлцэн ирсэн зочиддоо баярлалаа. Хэдхэн сарын өмнө бид Prime Сineplex Монголын анхны 4D кинотеатрыг нээсэн байгаа. Манай Зайсан Хилл цогцолбор маань кинотеатр, худалдаа үйлчилгээ, бусад тоглоомын талбай, гүүр, ресторан гээд хэсэг хэсгээрээ зургадугаар сар гэхэд үйл ажиллагаа нь нээгдээд явна. Энэ дагуу өнөөдөр энэхүү үйлчилгээний давхараа нээж байгаадаа маш их баяртай байна. Юуны түрүүнд манай Оюуны Ундраа групп нийт хамтрагч байгууллагууддаа амжилт хүсмээр байна. Та бүхний амжилт бидэнтэй шууд уялдаа холбоотой учраас түрээслэгч байгууллагууддаа маш их баярлалаа. Бид харилцан бие биенээ дэмжиж явна. Ингээд энэхүү хөтөлбөрийг нээж байгаадаа баяртай байна. Ирэх сараас манай 5 дугаар давхар, хүүхдийн тоглоомын давхар нээгдэнэ. Өнөөдрийн 4 дүгээр давхарын нээлтэд тавтай морилно уу.” хэмээн баярын сэтгэгдлээ хуваалцлаа.
Ийнхүү шинэ ондоо үүдээ нээж, нийслэл хотдоо өнгө үзэмж нэмсэн цогцолборын ээлжит бэлэг задарлаа. Шинэ гэрийн жаврыг үргээж морин хуурыг эгшиглүүлдэг Монгол ёсон буй. Үүний дагуу шинээр нээгдсэн худалдааны төвийн жаврыг үргээж, Хөсөгтөн хамтлагийн морин хуурч хөг аялгууны дээж өргөсөн бол мөн бусад уран бүтээлчид ая дууны эгшгэн цэнхэр хадгийг өргөн барьсан юм.
4 дүгээр давхарт үндэсний болон дэлхийн брэнд дэлгүүрүүдийн салбарууд нээгдсэн нь байршлын хувьд аялал жуулчлалын төвлөрсөн газарт байрлаж байгаагаараа ихээхэн ач холбогдолтой болжээ. Түүнчлэн тухайн нутаг дэвсгэрт ажиллаж, амьдарч буй иргэдэд заавал түгжрэлд гацан төвийг зорих шаардлагагүй болсон нь давуу талтай юм байна гэдгийг үйлчлүүлэгчид онцолж байлаа.
Тухайлбал, БЗД-ийн иргэн н.Оргил “Үнэхээр цэвэр, тухтай санагдлаа. Мөн олон салбар дэлгүүрүүд нэг дор цогцолсон нь таалагдлаа.” гэсэн бол мөн ХУД-ийн иргэн н.Дуламсүрэн “Хамгийн гоё санагдсан нь эндээс, нэг дороос бүх төрлийн үйлчилгээ авах боломжтой болж байна. Хүүхдээ тоглуулаад, гэр бүлээрээ кино үзэж, хооллоод, бас хүүхдээ тоглож байх хооронд нь дэлгүүр хэсчихнэ. Бүх юм нь нэг дор, их зүгээр юм байна.” хэмээн бидэнтэй сэтгэгдлээ хуваалцсан юм.
Нээлтийн үйл ажиллагааны төгсгөлд үйлчлүүлэгч, худалдан авагч зочдод зориулсан урамшууллын ажиллагаа болох сугалааны азтанг шалгарууллаа. Хүрэлцэн ирсэн үйлчлүүлэгчид Зайсан Хилл цогцолбороос тараасан брошурын булан дахь тусгай тасалбар дээр өөрийн овог, нэр, утасны дугаарыг бичиж, шилэн хоргонд хийсэн юм. Ингээд сугалааны азтанаар тодорсон үйлчлүүлэгчдэд Зайсан Хилл цогцолборын 4 дүгээр давхарт нээлтээ хийж буй дэлгүүр тус бүр өөрийн гарын бэлэг болон мөнгөн урамшууллыг гардуулан өглөө. Жишээлбэл, азтанууд David Jones-ын цүнх, Korea Optic-ын нүдний шил, Remax-ын чихэвч болон 50 мянга, 60 мянган төгрөгийн эрхийн бичиг гэх мэт маш олон мялаалгыг хүртэж байлаа.
Дашрамд дуулгахад, эндэхийн брэнд дэлгүүрүүд нь нээлтэд зориулсан хямдралтай, урамшуулалтай худалдаагаар үйлчлүүлэгчиддээ үргэлжлүүлэн бэлэг барьж байна. Нээлтээ хийсэн дэлгүүрээс товч танилцуулбал:
-Химийн орц найрлага агуулаагүй цэвэр органик бүтээгдэхүүн Lhamour
-Эрхэмсэг хатагтай таныг илэрхийлэх бүхий л хэрэгцээнд нийцэх цүнхний өргөн сонголтууд бүхий DAVID JONES
-Их хотын дэгжин хээнцэр бүсгүйчүүддээ хавар зуны шинэ загвараа танилцуулж буй ADORE BOUTIQUE
-Брэнд нүдний шил хараа зүйн үйлчилгээгээр тэргүүлэгч Korea Optic
-Спорт гутал хувцасны UNDER Armour
-Гар утастай хүн бүрийн хэрэгцээ цөм бүрэн Grand Remax
-Монгол дизайнеруудын ур ухаан шингэсэн үндэсний брэнд IVEEL
-Гоо сайхны LUZZAYA
-Гэр ахуйн гоёл чимэглэлийн дэлгүүр MA MAISON
-Итали гутлын дэлгүүр STIVALI
