Удахгүй болох хоёр Солонгосын удирдагчдын дээд хэмжээний уулзалтын үеэр барих үдийн зоогны цэсэнд “Такэсима” хэмээх маргаантай арлыг дүрсэлсэн шоколад багтсантай холбоотойгоор Япон улс Өмнөд Солонгост эсэргүүцлээ илэрхийлжээ. Энэ тухай телевизийн “NHK” сувгаас иш татан “Риа Новости” агентлаг мэдээлэв. Японы ГХЯ-ын Азийн хэлтсийн захирал Кэнжи Канасуги тус улсад суугаа Өмнөд Солонгосын ЭСЯ-нд болон Сөүл хот дахь Японы дипломат төлөөлөгчийн газраар дамжуулан Өмнөд Солонгос улсад эсэргүүцлээ илэрхийлжээ. Хоёр Солонгосын дээд хэмжээний уулзалтын үеэр барих үдийн хоолны цэсийг Өмнөд Солонгосын ерөнхийлөгчийн засаг захиргаа өмнө нь танилцуулсан бөгөөд амттаны төрөлд Такэсима арлыг багтаасан Нэгдмэл Солонгосын газрын зургийг хөх өнгөөр дүрсэлсэн цагаан шоколадтай цэлцэн орсон нь ийнхүү эсэргүүцлээ илэрхийлхэд хүргэсэн байна.
Такешима нь Японы тэнгис буюу Өмнөд Солонгосчуудын нэрлэдэгээр Зүүн тэнгисийн баруун хэсэгт байрлах хэд хэдэн жижиг арлаас бүрддэг юм. Солонгос улс Японы колончлолоос чөлөөгдөхөд буюу 1945 оноос хойш тус газар нь олон улсын маргаантай сэдэв болжээ. Одоогоор тус арлыг Өмнөд Солонгосын Зэвсэгт хүчин хянаж байгаа аж. 1905 онд Японы эзэнт гүрний бүрэлдэхүүнд багтаж байсан тус газар нутгийг Өмнөд Солонгос хууль бусаар эзлэн авсан гэж Японы эрх баригчид үздэг байна. Харин тус нутаг дэвсгэр нь эртнээс Солонгосын бүрэлдэхүүнд байсан газар юм гэж Өмнөд Солонгосын эрх баригчид үздэг аж.
