АНУ-ын Ерөнхийлөгч Дональд Трамп өмнөх төрийн тэргүүн нарын олон жилийн өмнөөс баримталж ирсэн бодлогыг өөрчлөн эртний түүхт Иерусалем хотыг Израилийн нийслэл хэмээн мэдэгдэж, палестинчуудын дургүйцлийг дээд цэгт нь хүргэжээ. Үүнээс гадна тэрээр Израилын өмнөх нийслэл Тель Авив хот дахь АНУ-ын Элчин сайдын яамыг Иерусалем хот руу нүүлгэх шийдвэр гаргасан бөгөөд өчигдөр тус хотод АНУ-ын ЭСЯ албан ёсоор нээлтээ хийсэн байна. Энэхүү нээлтийн ажиллагаанд Дональд Трампын ууган охин Иванка Трамп болон түүний хүргэн Жерад Кушнер болон албаны бусад хүмүүс оролцсон аж. Тэгвэл уг үйл явдалтай зэрэгцэн Израиль, Палестины хилийн Газын зурваст үймээн дэгдсэн бөгөөд уг үймээний улмаас Палестины 59 иргэн амиа алдаж, 2700 орчим хүн бэртэж гэмтжээ. Мөн энэхүү мөргөлдөөний үеэр найман сартай Лейла Анвар Гандур гэдэг палестин охин хорт хийн улмаас газар дээрээ амиа алдсан харамсалтай хэрэг гарчээ.
Энэ талаар “Риа Новости” агентлаг мэдээллээ. Харин Израилийн Ерөнхий сайд Беньямин Нетаниьяху уг үйл явдлын талаар мэдэгдэхдээ “Израилийн газар нутагт заналхийлсэн палестинчууд болон алан хядах Хамас бүлэглэлийн эсрэг цэргийн ажиллагаа явуулсан” хэмээн тайлбарласан байна. Мөргөлдөөнийг намжаахын тулд Израилийн армийнхан палестинчуудын эсрэг зэвсэг хэрэглэсэн бөгөөд харин Палестины эрх баригчид “Израильчууд палестинчуудын эсрэг санаатай аллага үйлдлээ” хэмээн мэдэгджээ.
