“Багануур дүүрэг дэх “Ноён-тур” амралтын газарт үйлчлүүлсэн хүмүүс хүнсний зүйлд хордож эрүүл мэндийн төвд хүргэгдэж ирсэн байна” гэсэн дуудлага мэдээлэл энэ сарын 9 өдөр Багануур дүүрэг дэх Цагдаагийн хэлтсийн жижүүрийн шуурхай албанд бүртгэгдсэн байна. Үүний дагуу Цагдаагийн байгууллагаас шалгалтын ажиллагааг явуулахад Багануур хувьцаат компани нь 40 жилийн ойн арга хэмжээний хүрээнд 3 үеийн уулзалт хүлээн авалтын арга хэмжээг энэ сарын 06-ны өдөр “Ноён-тур” амралтын газарт зохион байгуулсан байна. Уг арга хэмжээнд 27-79 насны нийт 72 хүн оролцжээ. Дээрх хүлээн авалтын арга хэмжээнд оролцсон хүмүүс нь энэ сарын 07-ны өдрөөс гэдэс өвдөж гүйлгэх, дотор муухайрах, толгой өвдөх, халуурах зэрэг хоолны хордлогын шинж тэмдэг илэрчээ. Энэ сарын 08-ны өдөр дүүргийн эрүүл мэндийн төвд нийт 15 иргэн хандаж эмнэлгийн тусламж авсан юм. Өнөөдрийн байдлаар дээрх үйл ажиллагаанд оролцсон хүмүүсээс 2 хүн Халдварт өвчин судлалын үндэсний төвд, Багануур дүүргийн эмнэлэгт 14 хүн хэвтэн эмчлүүлж байгаа аж. Албан бус мэдээгээр жимснээс хордсон байх магадлалтай гэж байгаа бөгөөд тухайн жимснүүдийг Барс захаас худалдаж авсан гэжээ.
“Ноён-тур” амралтын газрыг битүүмжлэн үйл ажиллагааг зогсоосон
Одоогоор мэргэжлийн хяналтын газар тандалт судалгааны ажлыг хийж байгаа юм байна. Ингээд Багануурын дүүргийн мэргэжлийн хяналтын хэлтсийн дарга н.Болдбаяраас зарим зүйлийг тодрууллаа.
-Багануур хувьцаат компани нь 40 жилийн ойн арга хэмжээний хүрээнд гурван үеийн уулзалт хүлээн авалтын арга хэмжээнд оролцсон иргэд хоол хордлогод орсон асуудал гарсан. Энэ талаар дэлгэрэнгүй мэдээлэл өгөхгүй юу?
-Багануур хувьцаат компани нь 40 жилийн ойн арга хэмжээнд оролцсон хүмүүс нь энэ сарын 07-ны өдрөөс гэдэс өвдөж гүйлгэх, дотор муухайрах, толгой өвдөх, халуурч энэ сарын 7-ны өдөр дүүргийн эрүүл мэндийн төвд хандсан байгаа. Тухайн амралтын газраас 32 төрлийн бүтээгдэхүүнийг лабораторийн шинжилгээнд хамруулсан. Шинжилгээний дүгнэлт хараахан гараагүй байна. Юунаас хордлого авсан бэ гэдэг нь нарийн тогтоогдоогүй байна. Иймээс дүгнэж мэдээлэх боломжгүй. Шинжилгээний хариуг хүлээгээд байж байна.
-Гурван үеийн төлөөлөл оролцсон гэсэн. Нийт хэчнээн хүн байсан бол?
-Эхний ээлжинд уурхайн 40 хүн очиж хооллосон. Дараагийн хэсэгт 33 хүн очиж хооллосон байгаа. Эхний хэсэг авч очсон хиам болон бусад жимсний зүйлийг ажилчдад тарааж өгсөн байгаа юм. Тухайн байгууллагын нэг алба хаагч гэртээ очоод тухайн бүтээгдэхүүнийг гэр бүлтэйгээ хувааж идсэнээс болж гэр бүлийн хүмүүст хордлогын шинж тэмдэг илэрсэн тул Багануур дүүргийн эрүүл мэндийн нэгдэлд ирсэн байгаа.
-Танайхаас ямар арга хэмжээ авч ажиллаж байна вэ?
-Шалгалтын хүрээнд Багануур дүүрэг дэх цагдаагийн хэлтэс, мэргэжлийн байгууллага эрүүл мэндийн төв болон Эрүүгийн цагдаагийн албаны Эдийн засгийн гэмт хэрэгтэй тэмцэх газар хамтран хордлогын шалтгаан нөхцөлийг тогтоох шалгалтын ажиллагааг хамтран явуулж байгаа. Мөн хүлээн авалтын ажиллагааг зохион байгуулсан “Ноён-тур” амралтын газрыг битүүмжлэн үйл ажиллагааг зогсоож амрагч нарын хэрэглэсэн гэх жимс ногоо, хоол хүнснээс дээж аван шинжилгээний лабораторид хүргүүлсэн байна.
Энэхүү хоолны хордлогод орсон иргэдээс ХӨСҮТ-д хоёр хүн хэвтэн эмчлүүлж байгаа юм байна. Мөн Багануур дүүргийн эрүүл мэндийн нэгдэлд 16 иргэн хэвтэн эмчлүүлж байгаа гэлээ.
