Японд урлагийн сургууль төгсч дуучин болсон Нара буюу М.Нарантуяа кинонд ч тоглож, бүр улс төрд хүртэл хүч үзэж байсан цаг саяхан. Харин одоо бол Нара зөгийчин, худалдаачин, бизнес эрхлэгч болсон. Ийнхүү салбар салбарт хүчээ үзэж яваа тэрээр энэ удаад хэвлэл мэдээллийн салбар луу шургалан оржээ. Түүний өнгөрсөн жилээс хойш тэсэн ядан хүлээж байсан төсөл нь өнөөдөр дэлгэцнээ гарах гэж байгааг дуулгалаа.
Энэ талаар тэрээр “Өнгөрсөн жилээс хойш тэсэн ядан хүлээсэн прожект маань өнөөдөр дэлгэцнээ та бүхэнд хүрэх гэж байгаад маш их баяртай байна. Чадах чинээгээрээ бусдын амьдралд гэрэл гийгүүлэх юм сан гэж хүсдэг миний хувьд энэ төсөл нэвтрүүлэг ч бас миний төдийгүй олон хүмүүсийн мөрөөдлийг биелүүлж баяр баясгалан авчирна гэдэгт итгэж байна. Ингээд энэ сарын “Мөрөөдлийн гал тогоо” буюу KitchenAll-ын иж бүрэн тавилга, иж бүрэн цахилгаан бараатай гал тогооны эзнээр ямар хүн шалгарахыг та бүхэн үзээрэй.
Жич: Нара нь үнэхээр таргалсаан эфирээр бүр аварга хүн шиг л гарах байгаа шүү тэгээд өршөөж уучилна биз.” гэлээ.
Харин улс төрийн тухайд гэвэл, түүнийг зөгийчин болсон нь улс төрч байснаас дээр хэмээн зөвлөсөн нэгэнд Нара ийм хариу өгчээ:
-Би ингээд л хувиа борлуулаад л урдахаа хийгээд явахад хангалттай сайхан амьдарчихна л даа. Гэхдээ ирээдүйд өөрийнхөө хүүхдэд, бас таны хүүхдэд сайхан нийгэм үлдээхийн тулд зорьсондоо бат зогсоно. Нөгөөтэйгүүр намайг УИХ-д байх үед лавдаг тэр танхимд одоо байгаа шиг элий нөхөд бөгс бөөрний асуудал хэлэлцэх биш, хүүхдийн амьдрах орчин, хүүхдийн болоод хүний эрх, эмэгтэйчүүдийн эрх, тэдний амьдрах, ажиллах орчинг сайжруулах талаар шийдэж байдаг байх болно.
Тэгэхээр дуучин, жүжигчин, сайн үйлстэн, нийгмийн идэвхтэн, зөгийчин, худалдаачин, бизнесмэн, мөн нэвтрүүлгийн хөтлөгч болсон Нара улс төрд хүчээ үзэх бодлоо одоо ч хаяагүй яваа юм байна. Түүний бас нэгэн сэтгэгдлийг хуваалцахад “Ер нь хүн үнэхээр өөрөө өсч дэвжихийг хүсч, тэрэндээ зорьж зүтгэвэл хэн ч ямар ч хязгаар тавьж чадахгүй шүү дээ. 10-н жилийн дараах, түүнээс дараах өөрийнхөө ирээдүйг тод харж байгаа маань хичээж байгаа бүхэнтэй маань нягт холбоотой байх” гэсэн нь улс төрийн тавцан дахь М.Нарантуяаг харж байна уу гэлтэй.
Хувийн бизнесийг эхлүүлээд чамгүй амжилттай яваа дуучин бүсгүй зорилгоосоо ухралгүй 2020 оны УИХ-ын сонгуульд дахин өрсөлдөнө гэдгээ хэвлэлд өгсөн ярилцлагадаа дурьджээ. Түүний одоо эрхэлж буй бизнес нь ирэх сонгуульд амжилттай оролцох эхлэл гэдгийг онцлон дурдсан байна. Нара өнгөрсөн сонгуулиар өдөр тутмын зардлаас гадна 50 сая төгрөгийг хувиасаа зарцуулжээ.
