Баяр наадмын өдрүүдэд Нийслэлийн Мэргэжлийн хяналтын газраас Төв цэнгэлдэх хүрээлэн, Хүй долоон худаг, Сүхбаатарын талбай, Үндэсний цэцэрлэгт хүрээлэн, Үндэсний соёл амралтын хүрээлэнд нийт 350 улсын /ахлах/ байцаагчид, худалдаа, хоол үйлдвэрлэл, ургамал хамгаалал, хорио цээр, мал эмнэлэг, эрүүл ахуй, халдвар хамгаалал, эрчим хүч, хийн түлш, хөдөлмөр аюулгүй ажиллагааны чиглэлээр хяналт тавьж ажиллалаа. Хүй долоон худаг болон Төв цэнгэлдэх хүрээлэнд НМХГ-ын явуулын хоёр лаборатори газар дээр нь шинжилгээ хийж ажиллав. Энэ сарын 11-ний байдлаар хяналт шалгалтад 791 аж ахуйн нэгж, иргэн хамрагдсан байна. Үүнд:
– Хоол үйлдвэрлэл-532
– Худалдаа-139
– Хүүхдийн тоглоом- 68
– Бусад-52
Хяналт шалгалтын явцад айргийг зориулалтын бус саванд худалдаалсан, зөвшөөрөлгүй цэгт гар дээрээс худалдаа эрхэлсэн, өгөгдсөн зөвшөөрөлд тусгаагүй үйлчилгээ эрхэлсэн, эрүүл мэндийн дэвтэргүй, цэвэрлэгээ үйлчилгээ хангалтгүй, ажлын хувцасгүй зэрэг 98 зөрчил илрүүлснээс 87 зөрчлийг арилгуулжээ. Зөрчил дутагдалтай 28 аж ахуйн нэгжид албан шаардлага өгсөн байна.
Явуулын лабораторид хуушуурны махны 8, айрагны 5 дээж шинжилгээнд хамруулжээ.
Зөвшөөрөлгүй цэгт худалдаа эрхэлж байсан 8 айраг, 5 шорлог, 3 хорхог, 7 хөөсөн чихэр 8 нүдний шилний худалдаа, 17 хүүхдийн тоглоомын худалдаа, хаана чанасан боловсруулсан нь тодорхой бус адууны умс китайн худалдаа зэрэг үйл ажиллагааг Цагдаагийн байгууллагатай хамтран зогсоов. Мөн зөвшөөрөлгүй айрагны худалдаа эрхэлж байсан айрагны 1 гэрийг буулгаж, 6 кг 46800 төгрөгийн шорлогны мах, 1.5 кг 4000 төгрөгийн түргэн гэмтэж муудах бүтээгдэхүүн, нийт 2 нэр төрлийн 7.5 кг 50800 төгрөгийн үнэтэй бүтээгдэхүүнийг хураан авч газар дээр нь устгаж шийдвэрлэсэн байна.
Шалгалтын явцад 32 аж ахуйн нэгж, байгууллагын ил гарсан цахилгааны утсыг газарт булуулж, далдлуулах арга хэмжээг авч, түлш алдагдаж байсан 2 аж ахуйн нэгжийн төхөөрөмжийг түр салгуулж, мэргэжлийн байгууллагад мэдэгдэж, яаралтай засварлуулах арга хэмжээг хөдөлмөрийн болон эрчим хүчний хяналтын улсын байцаагчид авч хэвийн ажиллагааг хангуулжээ.
Нийтийн эзэмшлийн зам дээр хүүхдийн эргэдэг машин ажиллуулж байсныг зөвшөөрөгдсөн талбай руу шилжүүлсэн байна.
Дашваанжил, Юнигаз, Горгаз, МС-Энержи зэрэг 4 аж ахуйн нэгжээс хийн хангамж үйлчилгээ үзүүлж, инженер техникийн ажилтнууд нь газрын тос, хийн хяналтын улсын байцаагчдын хяналтан дор угсралт ашиглалтын байдалд үзлэг хийж, аюулгүй ажиллагааг хангуулан ажиллав.
Баяр наадмын үеэр худалдаа үйлчилгээ эрхлэхээр зөвшөөрөл авсан аж ахуйн нэгж, байгууллага, иргэд ажлын байрны эрүүл ахуй, ариун цэврийн нөхцлийг сайтар хангаж ажиллахыг хяналт шалгалтын үеэр анхааруулж, иргэдийг зөвшөөрөлгүй ил задгай худалдаалж буй хүнсний бүтээгдэхүүнийг /хуушуур шорлог, өндөг/ худалдан авч, өөрсдийгөө болон гэр бүлийнхнээ эрсдэлд оруулахгүй байхыг анхаарууллаа. Түүнчлэн зөрчлийн тухай мэдээллийг Нийслэлийн Мэргэжлийн хяналтын газрын 70128012 дугаарын утсанд яаралтай мэдэгдэхийг сануулж байлаа.
Үндэсний их баяр наадам Уяачдын наадмаар үргэлжилж байна.
