Иргэдийн санамсар болгоомжгүй, хайнга байдлаас үүдэлтэйгээр үер, голын усанд амь насаа алдсан тухай мэдээлэл үргэлжилсээр байна.
Тухайлбал, Нийслэлийн Баянгол дүүргийн 1 дүгээр хороонд Дунд голын усанд эмэгтэй хүний цогцос байна гэсэн дуудлага өчигдөр 08:23 цагт иржээ. Нийслэлийн Онцгой байдлын газрын Аврах ангийн алба хаагчид дуудлагын дагуу очиж нэр, хаяг нь тодорхойгүй, 50 орчим настай эмэгтэй хүний цогцсыг гаргаж тус дүүргийн Цагдаагийн 1 дүгээр хэлтсийн жижүүрийн бүрэлдэхүүнд шилжүүлэн өгсөн байна.
Мөн Булган аймгийн Хутаг-Өндөр сумаас 7 км-т орших Хутаг багийн “Гуртын гүүр” гэдэг газар Сэлэнгэ голын усанд Орхон аймгийн Баян-Өндөр сумын харьяат 25 настай иргэн Б.Батлхагва /эрэгтэй/ осолдсон тухай дуудлагыг энэ сарын 11-ний өдрийн 07:19 цагт хүлээн авсан аж. Тус аймгийн Онцгой байдлын газрын алба хаагчид ар гэрийнхний хамтаар эрэн хайж байна. Өчигдрийн байдлаар Хутаг-Өндөр сумын Хутаг багийн “Хар-Усны тохой” гэдэг газраас тус багийн “Уул-Алтайн гол” гэдэг газар хүртэл 18.5 км-т 1 удаа гүний шумбалт хийж эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 19:45 цагт эрлийг түр зогсоож, өнөөдөр дахин эхлүүлээд байна.
Төв аймгийн Мөнгөнморьт сумын Байдлаг багийн “Их гутай” гэдэг газар Хэрлэн голын усанд нийслэлийн Багануур дүүргийн харьяат 57 настай иргэн Ж /эрэгтэй/ энэ сарын 13-ны 11:00 цагт согтууруулах ундаа хэрэглэсэн үедээ живсэн байж болзошгүй байна. Энэ талаарх мэдээллийг 14-ний өдрийн 17:21 цагт өгсний дагуу тус аймгийн Онцгой байдлын газрын алба хаагчид тус сумын Цагдаагийн байгууллагын алба хаагчид болон нутгийн захиргааны байгууллагынхан, ар гэрийнхнийх нь хамт, нийт 40 хүн эрэлд гарчээ. Өчигдрийн байдлаар тус багийн ”Сөвдөгийн гарам” гэдэг газраас “Улаан-Эрэг” гэдэг газар хүртэл 53 км-т эрэн хайх ажиллагааг зохион байгуулсан боловч үр дүнд хүрээгүй байна. Тиймээс өчигдөр 21:00 цагт эрлийг түр зогсоогоод өнөөдөр өглөө дахин эхлүүлжээ.
Дорнод аймгийн Цагаан-Овоо сумын Гүнцэнгэлэг багийн “Гүнцэнгэлдэх” гэдэг нууранд тус сумын харьяат 13 настай Б, Т /эрэгтэй/ өчигдөр 16:00 цагт осолджээ. Ослын дуудлагыг 16:20 цагт хүлээн авсан даруйдаа тус аймгийн Онцгой байдлын газрын алба хаагчид очин ажиллаж, мөн өдрийн 21:25 цагт цогцсыг нуурын уснаас гаргаж тус сумын Цагдаагийн хэсгийн төлөөлөгчид шилжүүлэн өгсөн байна.
Өдөр бүр гол ус, үерийн улмаас хүний амь эрсэдсэн тухай мэдээллийг дуулгаж, бүхий л хэвлэл мэдээллийн хэрэгслээр сэрэмжлүүлэг мэдээг хүргэж байгаа ч энэ асуудал буурахгүй байна. Тиймээс ард иргэдэд гол усны аюулаас сэргийлэхийг дахин анхааруулж байна.
