Польш Улсад сурч, ажиллаж, амьдарч ирсэн Жаргалсайханы Мишээл нь анх өөрийгөө кино од болно чинээ огт төсөөлөөгүй биз ээ. Учир нь тэр гуравхан настайдаа Польшийг зорисон гэдэг. Харин тэрээр өнөөдөр бол Польшийн кино урлагт хэдийнэ өндөр байр суурийг эзэлж, өөр бусад үйл хэргээрээ ч олны хайр хүндэтгэлийг хүлээсэн алдартан болж чаджээ. Ингээд түүний амьдралын гайхалтай хуудсуудыг хамтдаа сөхөн хуваалцъя.
/Өмнөхийг ЭНДЭЭС/
-Польшид Мишээлээс өөр нэрд гарсан Монгол хүн бий юу?
-Нээрээ сонирхолтой нь, Польш Улсад нэрд гарсан Азийн хоёр л хүн байдаг. Тэр нь хоёулаа Монгол. Нэг нь би, нөгөө нь манай найз н.Билгүүн гэж бий. Билгүүн 10 гаруй жилийн өмнө карьерээ эхлүүлсэн. Тэр бол хошин шогч буюу showman. Анх өөрийгөө Улаанбаатар телевизээс ирсэн сурвалжлагч гэж хэлээд янз бүрийн одод, улс төрчидтэй уулзаад шууд яриа авъя гэж хэлээд тэс хөндлөн юм асууж хүмүүсийг гайхашруулж, хөгжөөж байсан юм. Жишээ нь, юм асууж болох уу? гэж зөвшөөрөл авсанаа “Нойл хаана байдаг юм бол?” гэх мэтээр даажигнана. Эсвэл зураг авч болох уу? гэж асуугаад зөвшөөрөхөөр нь өөртэй нь биш өөр хүнтэй зургаа дарж өгөхийг хүсэх жишээтэй. Бас хоёр өрсөлдөж байгаа топ дуучдын овог нэрийг нь сольж хольж дуудах гэх мэтээр хошигнож явсаар олонд танигдсан. Анх хүмүүс түүнийг үнэхээр Монголоос ирсэн сурвалжлагч юм байх даа гэж их гайхаж байсан. Одоо бол олны танил болсон. Бас дуулдаг, дуулахын хажуугаар театрт тоглож байгаа.
-Олны танил болсон хүмүүс нэр хүндээ ашиглан сайн үйлсэд бусдыг уриалах, өөрсдийн хувь нэмрээ оруулах, нийгмийн туст үйл хийж амжилтын үр шимээсээ хуваалцдаг бичигдээгүй хуультай. Мишээл өнгөрсөн жил Монголд ирвэс хамгаалах асуудлаар ирж ажилласан сурагтай байсан. Энэ талаар мэдээлэл өгөөч.
-Өнгөрсөн жилээс би “Дэлхийн байгаль хамгаалах сан”-тай хамтарч ажиллаж эхэлсэн. Учир нь Польш болон Монгол дахь энэ байгууллага хамтын ажиллагаатай юм байна. Дэлхийд 4000 үлдсэн цоохор ирвэс Монголд байдаг. Манайх ирвэсийн тоогоороо дэлхийд хоёрт ордог. Би польшийн жүжигчин Монгол хүний хувьд хоёр орныг холбож, намайг элч болгосон. Тэгээд өнгөрсөн жил би сангийнхантай, мөн долоон телевиз, 20 гаруй сурвалжлагчдын хамт ирээд ирвэсийн талаар судалгаа хийж польшийн хэвлэл мэдээллийн хэрэгслүүдээр сурталчлах ажлыг хийлээ. Аялал судалгааныхаа зургийг би өөрөө авч, сценарыг нь өөрөө бичээд кино хийж ирвэсийн талаар польшуудад танилцуулж, Монголынхоо унаган байгалийг үзүүлж, ийм сайхан газар орон, байгалийг хамгаалах үйлсэд тусламж хүссэн юм. Үүнийг маань олны танил болсон одод дэмжиж, олон нийтэд маш сайн хүрсэн ажил болсон. Тиймээс энэхүү үйл ажиллагааг маань Польш дахь Монголын Элчин сайд дэмжээд ивээлдээ авсан байгаа. Энэ жил илүү их хөрөнгө оруулалт хийж, улам өргөн хүрээний ажил хийнэ гэж найдаж байгаа.
-Хүүхдийн төлөө чиглэгдсэн сайн үйлсийн ажил хийдэг гэсэн. Яг ямар ажил хийдэг юм бэ. Энэ талаар ярихгүй юу?
-Би нэгэнт олон нийтийн танил хүн болсон учраас үүнийг ямар нэгэн зөв чиглэлд зориулъя гэж боддог. Сайн үйлсийн аян, хандивын тоглолтонд их оролцдог. Жишээ нь, польш дахь доноруудыг дэмжих элчүүдийн нэг. Үүнээс гадна хүүхдэд зориулсан санхүүгийн дэмжлэг үзүүлэх чиглэлээр маш олон үйл ажиллагаа зохион байгуулсан.
Польшууд надад маш сайн. Тийм болохоор муу юм ховор бичдэг
-Багаасаа хүн бүрт танигдаад ирэхээр биеэ авч явах байдлаас эхлээд бэрхшээлтэй, хүндрэлтэй зүйл бий болдог байх. Ер нь хэр олны хараанд өртөж, шар хэвлэлд хэр их бичигддэг вэ?
-Польшид гадуур явахад хүн болгон таньдаг болохоор бие зөв авч явах ёстой. Би кинонд тоглож байх үед интернэт гэдэг зүйл дөнгөж дэлгэрч байсан. Шар мэдээ бол сүүлийн хэдэн жилд гарч ирсэн. Одоо бол шар мэдээг бол хүмүүс үнэхээр их дуртай уншина. Хов жив их бичнэ. Миний талаар их бичнээ. Нэг үзэхэд л “Мишээл үсээ тайрчихсан байна шоконд орлоо.”, “Мишээ үсээ шараар будчихсан байна, юу гэж бодож байна?”, “Мишээл найз залуутай болчихож, ваав царайлаг юм байна. Хэн гэдгийг нь мэдэх үү?”, “Мишээл дахиад сингл болсон шүү. Найз залуугаасаа салсан байна.” гэхчлэн хоёрын хооронд юмнууд зөндөө бичсэн байдаг. Гэхдээ бас чухал ажил хэргийн талаар бичилгүй яахав. Харин хүмүүс түүнээс илүү хов живийг нь сонирхож унших дуртай.
Гэхдээ польшууд надад маш сайн. Тийм болохоор муу юм ховор бичдэг.
-Манай олны танилууд гудамж талбайд тэр болгон үзэгдээд байдаггүй л дээ. Үнэтэй унаа тэргээр явж, ерөнхийдөө олны нүднээс нуугдмал хүмүүс байдаг гээд хэлчихэд болох байх. Мишээл польшид бас байнгын төмөр хүлэг унаад л, хар шил зүүгээд л хаяахан үзэгдээд л явдаг уу?
-Үгүй, гудамжаар чөлөөтэй алхаад л явдаг. Польш бол Америк шиг тийм зэрлэг биш. Польшид папараци ч тийм өндөр хөгжөөгүй орон. Гэхдээ гудамжаар явахад ихэнх нь таньдаг. Зарим нь зургаа авахуулна, зарим нь зөрж өнгөрөхдөө тэр байна гээд яриад өнгөрнө. Харин юу өмсөж, зүүсэн, нүүр, үсээ яаж засаж янзлуулсан байна гэдгийг их хардаг. Ялангуяа янз бүрийн арга хэмжээн дээр очихдоо ямар төрх байдалтай очдогийг ашиглаж байгаад юм бичдэг.
Миний хоёр өвөө олон хүн удирдан чиглүүлж явсан мундаг хүмүүс
-Багаасаа урлагийн ертөнцөд хөл тавьж, тэр тусмаа гадны улс оронд нэр хүндээ өндөрт өргөн гялалзаж яваа Монголын бас нэг бахархал бол яах аргагүй Ж.Мишээл юм гэж хэлэх байна. Цаашид эмч болохоороо кинонд тоглох уу?
-Би урлагийн ажилд анх хөл тавиад энэ жил 20 жил болж байна. Миний хувьд залуу хүн мөртлөө одоо 20 жил ажилласан байна гэж бодохоор бас л бахархалтай сайхан санагдаж байна. Анхны киноны ангиудыг хийгээд 2010 онд дууссан. Одоо болтол миний тоглосон анхны киног давтаж гаргадаг. Тэгэхээр зарим хүмүүс одоо ч энэ кино хийгдсээр байгаа гэж ойлгоод байдаг.
Би дээр хэлсэнчлэн их үлгэр жишээ эмчийг харж өссөн болохоор тийм чадварлаг эмч болъё гэж боддог. Бас гэтэл би багаасаа шал өөр ертөнцөд жүжигчний замаар явсан болохоор аль нэг талыг барьж шийдвэр гаргахад хэцүү. Би хоёуланд нь хайртай болохоор хослуулаад явна гэж боддог. Эмчийн дүрд тоглож болж байна. /сурв: инээв./
-Польш руу хэзээ буцах вэ?
-Би жил болгон Монголдоо ирж амардаг байсан. Харин энэ жил Монголдоо байж монгол ахуйдаа илүү дотносож, польшид суралцсан зүйлээ эх орондоо харуулж, би өөрөө ч гэсэн монголчуудаасаа их зүйлийг суралцах хэрэгтэй гэж бодож байгаа. Монгол бол миний төрсөн эх орон бол Польш ч гэсэн миний өсөж өндийсөн эх орон. Энэ хоёр орноо ямар нэгэн аргаар холбоё гэж дандаа боддог. Тэгэхээр одоо би Польшоос үзэсгэлэнт байгальтай Монголдоо төсөл боловсруулж ирээд түүнийгээ амжилттай хэрэгжүүлээд эргээд польшуудад үзүүлмээр байгаа юм. Өөр олон төсөл хөтөлбөр боловсруулж хэрэгжүүлэх санаа байна. Хамгийн гол нь тэдгээр санаануудаа тодорхой болгохын тулд би Монголдоо байх хэрэгтэй. Тиймээс энэ жилдээ би Монголд байна гэж бодож байгаа. Энд бас урлагийнхантай танилцаж, хамтарч юу хийж болохоор байна гэдгийг судалж, сонирхох хүсэлтэй байна.
-Ярилцлагын төгсгөлд хэн нэгэнд хандаж хэлэх үг байвал энэ зай, хугацааг тэр хүмүүст зориулах уу?
-Би гэрийнхнийхээ тухай бахархаж ярих дуртай. Хүн гэж ямар хүмүүжилтэй, дотроо ямар сэтгэлтэй байх ёстой, ямар өндөр түвшинд хүрэх боломжтой вэ гэдгийг хоёр өвөөгөөс харж суралцсан гэж ойлгодог. Миний хоёр өвөө олон хүн удирдан чиглүүлж явсан мундаг хүмүүс юм. Аав Жаргалсайханы аав С.Батсүх бол Замын цагдаагийн хоёр дахь дарга нь байсан цагдаагийн хурандаа хүн. Харин ээж Эрдэнэцэцэгийн аав Хурц бол геологи, уул уурхайн сайд байсан хүн. Тэд маань хүн зөвхөн өөрийнхөө эргэн тойрон, идэж уухаа бодоод явж болохгүй, хийж байгаа үйл хэрэг болгон үр дагавар, ул мөртэй байдаг гэдгийг хэлж ойлгуулж, хүмүүжүүлсэн. Тийм болохоор би өөртөө маш өндөр шат, шалгуур тавьж, олон сайн сайхан ул мөр үлдээж явах юм сан гэж мөрөөдөж явдаг юм.
-Үнэхээр сонирхолтой яриа өрнүүллээ. Энэ удаад ингээд өндөрлөе. Эргээд шинэлэг, соргог мэдээлэлтэйгээр уулзацгаая. Уран бүтээлийн арвин их ургац хураахыг ерөөе.
-Баярлалаа.
