Оффшорт дүүргийн цагдаа “багадана”

\”Цензургүй яриа” нэвтрүүлгийн хөтлөгч, сэтгүүлч Л.Мөнхбаясгалан өөрийн
фэйсбүүк хуудастаа \”Сэтгүүлч
миний бие АНУ-ын Вашигтонд орших Олон улсын эрэн сурвалжлах
сэтгүүлчдийн холбоотой уулзаж гишүүнээр элсэн Монголын олигархуудын талаарх
оффшор мэдээллүүдийг авахаар өнөө шөнө
00.55 нисэх байлаа. Гэтэл Эрүүгийн цагдаагийн газрын ахмад Баасанжав ажил тарсны
дараа 20.00 цагийн үед гэнэт дуудав. Ажил тарсны дараа утсаар ярьсан учир дараа
очьё гэтэл албадан авчирна хэмээв.

Онгоц нисэхээс өмнө гялс уулзчаад явья гээд
очтол Эрүүгийн хэрэг үүсгэн улсын хилээр гарахыг хориглов. Ийнхүү оффшорчдын мөрөөр
орж олон улсын сэтгүүлчидтэй нэгдэх гарцыг минь хаалаа. Энэ их чухал ажил байсан юм аа, уг нь. Сүүлийн үед манай багт үзүүлж байгаа дарамт хэрээс
хэтэрлээ. Маргааш хэвлэлийн бага хурал хийж олон түмэнд дэлгэрэнгүй мэдээлэл
өгнөө, өнөө шөнө баривчлагдчихгүй бол. Та бүхэнд баримт болгож авчихсан байсан онгоцныхоо тийзийг оруулав” хэмээн зурагнуудтай хамт нийтэлжээ.

 

Энэ мэтчилэн оффшорчдын талаар
мэдээлэл олж авах гэсэн, мэдээлэл бичсэн сэтгүүлч, сайтуудыг зарим нэг улстөрч,
бизнес эрхлэгчийн гомдлын дагуу дүүргийн цагдаагаас дуудаж тайлбар аваад буй. Түүнчлэн
зарим нэг улстөрчид өөрсдийгөө оффшор дансгүй гэдгээ шалгуулахаар хандаад
байгаа гэдгээ мэдэгдсэн. Гэхдээ оффшорыг \”халаасны хулгайч”-тай тэмцдэг
дүүргийн мөрдөн байцаагч шалгахад дэндүү \”жулддаг байхгүй юу\”, тэдний мэдлэг
чадвар арай \”багадана\”. Тиймээс шалгуулахыг хүсвэл Эрүүгийн цагдаагийн газар /ЭЦГ/-ын
Эдийн засгийн гэмт хэрэгтэй тэмцэх хэлтэс болон Авлигатай тэмцэх газарт хандах
нь зүйтэй болов уу. Нөгөө талаас Монгол Улс оффшорчдынхоо талаар дэлгэрэнгүй
мэдээллийг Олон улсын эрэн сурвалжлах сэтгүүлчдийн холбооноос хүсэх цаг нь
болсон.

 

Учир нь улстөрчид дуу дуугаа авалцан \”Би оффшоргүй”, \”Оффшор байгаа ч
дотор нь мөнгө байхгүй” гэж ирээд л мэдэгдэл хийх болсон. Тэдний хувьд сонгууль
дөхсөн энэ үед ямар ч хамаагүй аргаар үгүйсгэж цаг хожиж байгаад УИХ-ын зөөлөн
суудалдаа дахин тухлахыг хүсч байгаа. Мөн өөрийгөө гүтгүүлсэн гэж ирээд л
чадамж нь хүрэхгүй дүүргийн цагдаад хандаж байна. ЭЦГ Л.Мөнхбаясгалан
сэтгүүлчийг АНУ-ыг зорьж Монголын оффшорчдын талаар мэдээлэл олж авахыг
хориглосон.

 

Тус газар өөрийнхөө шугамаар Олон улсын эрэн сурвалжлах сэтгүүлчдэд
хандаж мэдээлэл авах боломжтой. Цаашлаад мэргэшсэн мөрдөн байцаагчаа явуулах
эсвэл бүр сэтгүүлчийн дүрд хувиргаж илгээж байгаад ч болов энэ хэдэн оффшорчдын
талаар дэлгэрэнгүй мэдээлэл олж, тэдний оффшор дансанд хэдий хэр хэмжээний
мөнгө байгаа болон хаанаас орж ирснийг нь шалгаж тодруулах ёстой бус уу.
Оффшорыг илрүүлье гэвэл том хөдлөх ёстой. Түүнээс бус дүүргийн цагдаад хандаад
асуудлыг нам дарчихна, оффшоргүй гэдгээ баталчихна гэвэл тэрэн шиг худлаа зүйл
байхгүй. Оффшор бол мэргэшсэн хүмүүсийн мэргэжлийн хулгай. Түүнийг халаасны хулгайчаас хэтрэхгүй чадвартай жирийн нэг хууль сахиулагч шалгаж тогтооно ч гэж юу байхав.