Их хуралд тойргоо төлөөлдөг ч байгаа үгүй нь мэдэгдэхгүй гишүүдийг “короля” гэж нэрлэдэг. Тэгвэл короля нарын нэг нь Дундговиос сонгогдсон Б.Наранхүү гишүүн юм. Тэрээр үг дугарах нь битгий хэл чуулганы хуралдаа ч ирдэггүй. Хамгийн олон тастай ангийнхаа хамгийн “муу сурлагатан”-уудын нэгэн л дээ.
Тэгсэн сүүлийн үед улс төрийн агуулгатай хурал, чуулганд ихээр оролцож, олныг ангайлгаж, инээлгэсэн үг, үйлдэл гаргах боллоо. Бүтэн сар гаруй хугацаанд нам гүм байсан төрийн ордноос өнөөдөр Б.Наранхүү гишүүний үг хэлж байгаа бичлэгийг олж хараад бараг баярлах шиг. Гэхдээ хэлсэн үгэнд нь авах юм тун цөөхөн. УИХ-ын даргыг л өмгөөлөөд байгаа бололтой юм. Ийм зорилготой төрийн ордон руу ирсэн биз. Түүнээс тэрээр ямар чуулганы үйл ажиллагааг ойлгох биш. Газрын наймаагаар М.Энхболд, Б.Наранхүү нарыг холбогдсон гэж ярьж, бичдэг. Улаанбаатар хотын усны нөөц бүхий газрыг бүхэлд нь эзэмшиж, Дүнжингарав нэртэй дүүрэг хүртэл байгуулах хүсэлтэй явдаг хүнийг том “газрын наймаачин” гэж нэрлэхгүй бол өөр хэнд тийм алдар ноогдох билээ.
Хэлж хийж буйгаас нь Б.Наранхүү гишүүнийг хээгүй гүндүйгүй гэх нь бий. Биеэ авч яваа байдал нь ч түүнийг билиг танхай монгол эр гэж нэрлэхэд хүргэдэг биз. Билиг танхай хүнд ёс журам үйлчилнэ гэж ямар байх биш. Төрийн ажлыг юман чинээ үл тоож, чуулганы хуралдааныг хэнэг ч үгүй тасалдаг түүнд Төрийн ордны хаалгаар биеийн тамирын цамцтай нэвтэрч ороод л хурлын тамхимд суучихсан үг хэлэх юу ч биш. Ер нь тэрээр төрийн ордонд дотоод журам гэж байдгийг мэддэг ч үгүй байж мэдэх юм. Тэгээд ч “ах”-ыгаа өмгөөлж ганц үг хэлэхээр их холоос яаран ирсэн юм уу гэж бодогдлоо. Ийм л гишүүд биднийг төлөөлж, хуульчилсан дүрэм журмаас холуур, үл тоомсорлосон шинжтэй аж төрж, хууль баталж байна.
Болдогсон бол төрийн ордон билиг танхай монгол эрсээр дүүргэчих юмсан. Амар шүү дээ. Төрийн ордондоо хааяа нэг хурал зохион байгуулчихаад бусад үед нь урлаг уран сайхныханд түрээслүүлчихнэ биз. Төсөвт ч нэмэр болно.
