Дэлхий дахиныг шуугиулаад байгаа “The Hu” хамтлагийн “Wolf Totem” дуу АНУ-ын “Биллбоард”-ын “Hard Rock” дууны борлуулалтын жагсаалтыг тэргүүлж байна. Өнгөрсөн долоо хоногт буюу дөрөвдүгээр сарын 11-ний байдлаар энэхүү дууны таталт 1056 хувиар өсөж, нийт 6000 удаа татагджээ. Энэ тухай дуу хөгжмийн “Billboard” чарт өөрийн сайт хуудсандаа мэдээлжээ.
Харин “Wolf Totem” дуу “Billboard”-ийн дэд чарт болох “Hot Rock Songs” чартад 22-т эрэмбэлэгдсэн байна. Энэхүү үйл явдал нь монголын уран бүтээлчдээс анх удаагаа “Billboard” чартад бичигдсэн анхны тохиолдол болж байгааг явдал юм. Одоогийн байдлаар “The Hu” хамтлагийн тус дууг АНУ даяар нийт 272000 удаа стриминг хийжээ.
Тус хамтлагийн продюсероор Монгол Улсын гавьяат жүжигчин, дуучин, продюсер Б.Дашдондог ажиллаж буй бөгөөд “The HU” хамтлаг Ц.Галбадрах, Б.Энхсайхан, Г.Нямжанцан, Н.Тэмүүлэн гэсэн дөрвөн хүний бүрэлдэхүүнтэй аж.
