Өмгөөлөгч Г.Батбаяр гэх нөхөр эрх мэдэл албан тушаалаа ашиглан бусдыг дарамтлан дээрэлхэх мөртлөө, энэ аархуу занд нь тохирсон шийтгэл оногдуулах зорилгоор мэргэжлийн холбоо нь хуралдах гэхээр арга заль гарган хойшлуулсаар байна.
Хурал зарлагдахад өвчтэй гэх шалтгаанаар эхний удаа хойшлуулсан. Дараа нь өмгөөлөгчөө сольж байгаа гэж хэлэн дахин нэг удаа хойшлуулсан. Үүний дараа шүүх бүрэлдэхүүнээс татгалзаж дахин хойшлуулав. Хамгийн сүүлд өмгөөлөгч нь нүдний шилээ орхисон гэдэг шалтгаанаар хурлыг хойшлуулжээ…
Энэ мэтээр шалтаг, шалтгаан гаргаж хурлыг хойшлуулсаар байх санаа Г.Батбаярт байгаа бололтой. Дараагийн хурал дээр бал үзэг, бандааш турсинк гээд байж болох бүгдээ л орхиж, гээгдүүлж мэднэ.
Тиймээс Г.Батбаярын ёс зүйн зөрчилд тохирсон шийтгэл оногдуулахын тулд гомдол гаргагч талаас орхиж болзошгүй бүгдийг нь бэлдэж очих ёстой болж таарч байна.
Ер нь хуульчдын холбоо нь мэргэжил нэгтнүүдийнхээ нэр хүндийг унагасан, ёс зүйн алдаа зөрчил ихтэй, эрх мэдэл албан тушаалаа амин хувийн ашиг сонирхлын төлөө ашигладаг, бусдыг хууль мэдэхгүйгээр далимдуулж, дээрэлхэн дарамталсан энэ этгээдэд хариуцлага хүлээлгэх, өмгөөллийн эрхийг нь түдгэлзүүлэх хүсэл сонирхол алга байна уу гэх хардлага төрөөд эхэллээ. Түүнээс биш шалтаг шалтгаан гарган зориудаар хурлыг хойшлуулж байгаа энэ этгээдэд анхааруулга, сануулга өгч байгаад асуудлыг нь хэлэлцэж шийдвэрлэж болмоор л санагдаж байна. Цаашдаа хурал хэдэн удаа хойшилж, Г.Батбаяр хэдэн удаа эд зүйлсээ мартахыг тааж мэдэхгүй байна.
Магадгүй Монголын хуульчдын холбоо дотооддоо хэзээ салхи оруулж, энэ мэт болохгүй нөхдөөсөө салах хүсэлтэй болно тэр үед л хурал албан ёсоор явагдах юм шиг байна. Харин тэр болтол мэргэжлийн ур чадваргүй, ёс зүйн зөрчилтэй этгээд өмгөөлөгч нэрээр бусдыг хохироосоор явах юм байна.
Өөрийнх нь ёс зүйн асуудлыг ярих хурал зарлагдахаар тун их айж байгаа нь мэдэгдэж байна. Тиймээс л ялих шалихгүй асуудлаар яаж ийгээд л хурлыг хойшлуулах сонирхол Г.Батбаярт бий. Арга ч үгүй биз. Бусдыг залилан мэхэлж, дарамтлан сүрдүүлэх хэрэглүүр болсон эрх мэдлээсээ салчихвал тэр хэн юм бэ. Хэн ч биш шүү дээ. Тиймээс үхэн хатан зууралдаад байгаа нь энэ аж.
Гэвч өмгөөлөгч гэх энэ мэргэжил Г.Батбаяр нар шиг шударга бусаар амиа зогоох хэрэглүүр мөн үү… ?
