Цагдаагийн байгууллагад ирж буй залилуулсан гэх гомдол мэдээллийн тоо жилээс жилд өсөж буй тул Мөрдөн байцаах алба (МБА)-наас “Ятгах тусам нягтал” хэмээх энэ төрлийн хэргээс урьдчилан сэргийлэх аяныг орон даяар зохион байгуулж эхэлсэн. Сүүлийн үед фэйсбүүк орчинд иргэдийн хувийн мэдээллийг ямар нэг аргаар олж аваад, найз нөхдийг нь залилах үйлдэл банкны дансаар дамжих болсон. Мөн улс дамжуулан залилан мэхлэх гэмт хэрэг үйлдэж буй хүмүүсийн гүйлгээ ч банкны дансаар дамжиж буй учраас Төвбанк, Монголын банкуудын холбоотой МБА хамтран уг аяныг хэрэгжүүлж буй билээ.
2018-2019 онд үндэстэн дамнасан залилагчдаас болж манай аж ахуй нэгжүүдэд 1.8 сая ам.доллар буюу 3.8 тэрбум гаруй төгрөгийн хохирол учирсан гэнэ. Гэмт хэрэг үйлдэж буй хүмүүсийн олонх нь гадаадад, тэр дундаа Африкийн орнуудад байдаг учраас хохирлыг нь тэр бүр барагдуулж чаддаггүй. Манай улс 20 оронтой эрх зүйн талаар харилцан туслалцах гэрээ байгуулсан ч Африкийн улсуудтай ийм гэрээгүй учраас мөнгө хүлээн авагчийн дансны эзэмшигч хэн гэдгийг тогтоохоос эхлээд и-мэйл хаягийн жинхэнэ эзнийг тогтоох боломжгүйг МБА-ны Залилах гэмт хэрэг мөрдөн шалгах хэлтсийн ахлах мөрдөгч, хошууч Б.Эрдэнэдэлгэр анхаарууллаа. Тэрбээр “Цахим залилангийн хохирогч болохгүй байх боломж бий. Манай аж ахуйн нэгжийн санхүүгийн албанд ажиллаж буй хувь хүний хариуцлагатай энэ нь холбоотой. Харилцагч байгууллагаас ирж байгаа и-мэйл цахим захидлыг анхааралтай уншиж нягтлах ёстой. Байнгын харилцагчаас ирж байгаа цахим захидалд дансны дугаар өөрчлөгдсөн байвал хариу зурвас бичилгүй, утсаар нь холбогдож лавлах хэрэгтэй. Гадаадаас ирсэн цахим захидлын улмаас хохироод буй манай компаниудын холбогдох албан тушаалтнууд дансны дугаар солигдсон, хуурамч хаягаас зурвас ирэнгүүт нягтлалгүйгээр мөнгөн гуйвуулсан байна.
Цахим шуудангаар ирж буй захидлаас үүдэлтэйгээр 2017 онд дэлхийн хэмжээнд 146 сая ам.долларын хохирол учирсан. 2018 онд 1.2 тэрбум ам.доллар болж өссөн учраас Олон улсын эрүүгийн цагдаагийн байгууллага буюу Интерполоос гишүүн орнуудынхаа цагдаагийн байгууллагад “Энэ төрлийн залилангийн хохирлыг барагдуулах боломжгүй байна. Тиймээс үндэснийхээ компаниудад сэрэмжүүлнэ үү” гэсэн анхааруулга өгсөн” гэлээ.
