Улсын Онцгой комиссын өнөөдрийн хуралдаанаар Монгол Улсын иргэдийг гуравдугаар сарын 30-ныг хүртэл дэлхийн аль ч улс уруу зорчихгүй байх уриалгыг гаргалаа.
Италиас 27, Иранаас 12 улсад шинэ коронавирусийн халдвар зөөвөрлөгдсөн
Дэлхийн 100 орон шинэ коронавирусийн халдвар бүртгээд байгаа бөгөөд гаднын аль ч улс орны хувьд эрсдэл өндөр болсон байгааг дурдлаа.
2020 оны нэгдүгээр сарын 9-нөөс хойш манай улсын хэмжээнд 901 хүнийг ажиглалтад авч 262 сэжигтэй хүнээс шинжилгээ авч, сөрөг гарсан. Харин өнөөдрийн байдлаар сэжигтэй гурван тохиолдлыг тусгаарлан шинжилгээ авч буй бөгөөд 498 хүнийг ажиглалтад байлгаж байна гэдгийг Эрүүл мэндийн сайд мэдээллээ.
Эрүүл мэндийн сайд Д.Сарангэрэл “Италиас 27, Иранаас 12 улсад шинэ коронавирусийн халдвар зөөвөрлөгдсөн.
Энэ нь манай ард иргэд онцын шаардлагагүй бол гадаадын аль ч улс уруу зорчих хэрэггүй гэдгийг уриалахыг хүсэж байна. Дэлхийн бөмбөрцгийн улс орнуудын 50 гаруй хувьд шинэ коронавирусийн халдвар нэгэнт илэрлээ. Зарим орны хувьд бусад оронд зөөвөрлөгдөх бодит эрсдэл байгаа учраас ядаж гуравдугаар сарын 30-ныг хүртэл гаднын аль ч улс орон руу зорчихгүй байж, тэсээч ээ гэдгийг хэлмээр байна. ДЭМБ болон ДЭМБ-ын Ухань мужид ажилласан шинжээчдийн багийн өгсөн мэдээллээр өндөр настан, архаг хууч өвчтэй буюу зүрх судас, чихрийн шижинтэй хүмүүст хүндрэх тохиолдол байгаа учраас ЭМЯ ахмад настан руу чиглэсэн анхаарал халамжийн чиглэлийн зөвлөмжийг өгч байна. Үүнийг хэрэгжүүлэх хэрэгтэй” гэсэн юм.
Харин шинж тэмдгийн тухайд
Халуурах 88
хуурай ханиалгах 68
ядарч сульдах 38
цэр гарах 33
амьсгал давхцах 19
хоолой өвдөх 14
толгой өвдөх 14
булчин өвдөх 15
бие зарайх 11
бөөлжих 5
хамар битүүрэх 5
гүйлгэх 4 хувийн шинж тэмдэг байна.
