Эрүүл мэндийн яамнаас мэдээлэл хийж байна.
ДЭМБ-ын мэргэжилтэн О.Ариунтуяа, Халдварын тархалт өнгөрсөн 24 цагт 1000 гаруйгаар нэмэгдсэн хоёр улс байгаа нь Иран, Итали. Итали улсад нийт 366 хүн нас барсан, хэд хэдэн хотод 16 сая хүнийг хамарсан хөл хорио тогтоолоо. Солонгост халдварын тохиолдол буурч байна. 360 тохиолдол шинээр бүртгэгдэж, 19 мянган хүн шинжилгээнийхээ хариуг хүлээж байна.
ДЭМБ-аас коронавирусийн халдварын тархалтаар нь үе шатад хувааж үзэж байна. Үүнд:
1. Тохиолдол бүртгэгдээгүй
2. Нэг буюу түүнээс дээш импортлогдсон
3. Дэгдэлт голомтлон тархаж байгаа
4.Өргөн цар хүрээний тархалттай гэсэн 4 үе шатад хувааж, үе шат бүхэнд тохирсон зөвлөмжийг улс орнуудад өгч буйг Монгол Улс мөрдөж байна.
АНУ-д 1114 хүнийг хөлөг онгоцон дээр 14 хоног тусгаарлаж байна. Улс орнууд гадаадад зорчоод ирсэн хүмүүсийг тусгаарлах байр, эсвэл гэрт нь 14 хоног тусгаарлах арга хэмжээ авч буй юм.
ЭМЯ-ны Эмнэлгийн тусламжийн газрын дарга Я.Буянжаргал, Тусгаарлах байранд 511 хүн хянагдаж байна. Нийт 914 хүнийг тусгаарласан. Өнөө өглөө Нурсултан УБ-ын онгоцоор 22 иргэн ирсэн, тусгаарлагдсан хүн байхгүй. Берлин-Москва-УБ-ын онгоцоор 82 иргэн ирснээс Японоос ирсэн нэг иргэнийг тусгаарлалаа.
ГХЯ-ны Консулын газрын захирал Л.Мөнхтүшиг, Япон, Солонгост манай иргэд эх орондоо буцах хүсэлтээ гаргаж байна. Солонгосын ЭСЯ-д 120 гаруй иргэн эх орондоо ирэх хүсэлт гаргасан. Бид хүсэлтийг УОК-т хүргүүлсэн.
3000 гаруй иргэн гуравдугаар сарын сүүлчээр Монголд зорчих билетээ бичүүлжээ. Хятад, Япон, Солонгос, Итали, Иран улсаас зорчигч хүлээн авахгүй. Монгол Улсын иргэн бол14 хоног өөрийн зардлаар тусгаарлагдах журам мөрдөгдөж байна. Өнөөдөр тусгаарлах байрны хүрэлцээ хангалтгүй байна. Ирсэн иргэд тусгаарлах байрны журам зөрчих, төлбөрөө төлөхгүй хүндрэл учруулж байгаа. Япон, Солонгосоос ирэх иргэд Москва, Берлиний чиглэлийн нислэгээр ирэх боломжтой, ирээд өөрийн зардлаар 14 хоног тусгаарлагдана гэдгийг хатуу анхаарах хэрэгтэй.
