Эрүүл мэндийн яамнаас коронавирус буюу “Covid-19” халдварт өвчний нөхцөл байдлын талаар ээлжит мэдээллээ хийлээ. Монгол Улсын нөхцөл байдлын талаарх мэдээллийг нэгтгэн хүргэж байна.
Эмнэлгийн тусламжийн бэлэн байдлын талаар ЭМЯ-ны Эмнэлгийн тусламж, үйлчилгээний газрын дарга Я.Буянжаргал мэдээлэл өглөө.
Тэрээр “Нэгдүгээр сарын 9-нөөс хойш 1,697 хүнийг ажиглах байранд тусгаарлан ажигласан. Яг одоогийн байдлаар 945 хүн ажиглалтын байранд эмчийн хяналтад байна. Харин нийт 291 сэжигтэй тохиолдолд шинжилгээ хийсэн. Өчигдөр хоёрдугаар сарын 29-нөөс гуравдугаар сарын 9-ний хооронд Франц улсын долоон жуулчинд үйлчилж, Хөвсгөлийн Хатгал руу яваад буцаж ирсэн гэсэн өгүүлэмжтэй нэг иргэнийг ХӨСҮТ-д тусгаарласан. Тус иргэн нь гүйлгэх, халуурах зовуурьтайгаар тусгаарлагдсан. Шинжилгээ одоогоор хийгдэж байгаа бөгөөд биеийн байдал нь тогтвортой байна.
Иргэдэд бид гурван сар зөвлөгөө өгсөөр байхад гаднын улс орон руу зорчиж, гадаад иргэдэд үйлчилсэн байгаа учраас иргэдэд бидний өгч буй зөвлөгөө зөвлөмжийг онцгой анхаарах нь зүйтэй. Мөн Дархан-Уул, Сэлэнгэ аймагт тусгаарлагдсан иргэд дунд Бельги, Швейцар, Герман, Францаар дамжин ирсэн гэр бүлийн иргэд байна. Вьетнам, Эрхүү, Улаан-Үдээр орж ирсэн хүн бий. Мөн Сөүл, Филиппин, Хонг-Конг, Тайланд, Эрхүү, Улаан-Үд гээд маш олон улсаар дамжиж иргэд ирсээр байна.
Өчигдөр Сөүл-Улаанбаатарын чиглэлийн тусгай үүргийн онгоцоор 244 иргэн ирсэн. ХӨСҮТ-д Тэгү, Бусаны чиглэлээс ирсэн 10 иргэнийг тусгаарласан бол Цэргийн төв эмнэлэг дээр эмнэлгийн тусламж, үйлчилгээ шаардлагатай буюу жирэмсэн, хэвтрийн, тэргэнцэртэй, нярай зэрэг нийт 51 хүнийг хүргэсэн. Харин “Энх саран” сувилалд 184 иргэнийг тусгаарлан ажиглаж байна.
Өнөөдөр өглөө Берлин-Москва чиглэлийн онгоцоор 231 хүн ирснээс бөөрний эмчилгээ шаардлагатай иргэнийг Цэргийн төв эмнэлэгт тусгаарласан бол өндөр эрсдэлтэй газраас ирсэн, халуурсан өгүүлэмжтэй нийт 17 иргэнийг ХӨСҮТ-д тусгаарласан. Ямар нэг зовуурьгүй, шинж тэмдэггүй байгаа иргэдийг “Амар” зочид буудалд тусгаарлахаар бэлтгэсэн бөгөөд ГССҮТ-ийн эмч ахлан ажиллаж байна.
Мөн өнөөдөр орой Токио-Улаанбаатар чиглэлийн онгоц бууна. Урьдчилсан байдлаар тус онгоцонд 270 иргэн ирнэ гэсэн мэдээлэл байгаа бөгөөд үүнээс 56 иргэнд эмнэлгийн тусламжийн үйлчилгээ зайлшгүй шаардлагатай гэж үзэж байна” гэлээ.
Зоонозын өвчин судлалын үндэсний төвийн ерөнхий захирал Н.Цогбадрах: Халдвар гарсан цагаас эхлэн Монгол Улсад коронавирус зөөвөрлөгдөн орж ирэхээс урьдчилан сэргийлж эцсийн халдваргүйжилтийг хийж ажилласан. Сүүлийн өдрүүдэд Монгол улсын засгийн газар гадаад оронд байгаа иргэдээ тусгай үүргийн онгоц гарган эх орондоо авчирч байна. Үүнтэй холбогдуулан манай төв дээр эцсийн халдваргүйтгэл хийн ажилчид маань бэлэн байдалтай ажиллаж байна. Өчигдрийн тухайд онгоц болон эмнэлгүүдэд халдваргүйтгэл хийхэд гурван баг гаран ажилласан. Өнөөдөр мөн адил хоёр баг гаран ажиллаж байна.
Мэргэжлийн байгууллагууд хэдийгээр авах ёстой арга хэмжээгээ аваад ажиллаж байгаа ч иргэд маань мэргэжлийн байгууллагаас гаргасан зөвлөмж зөвлөгөөг авч байх хэрэгтэй байна” гэв.
