ОХУ-ын Вектор вирус судлал, биотехнологийн төв ирэх арваннэгдүгээр сар гэхэд өөрсдийн боловсруулсан “COVID-19” эсрэг вакциныг үйлдвэрлэлд нэвтрүүлэхээр төлөвлөж байгаа талаар тус улсын төрийн мэдлийн “TASS” агентлаг мэдээллээ.
Вектор судалгааны хүрээлэнгийн захирал Ринат Максютов ням гаригт “Россия-1” сувгийн “Вести” нэвтрүүлэгт оролцох үеэрээ “Бид 2020 оны арваннэгдүгээр сард COVID-19-ийн эсрэг вакциныг үйлдвэрлэлд нэвтрүүлэхээр төлөвлөж байна. Тиймээс хамгийн ойрдоо бид энэ оны төгсгөл эсвэл ирэх оны эхээр эрсдэлт бүлгийн иргэдийг түрүүлж вакцинжуулах асуудалд шилжиж болох юм” гэжээ.
Үүнээс өмнө ОХУ-ын Шадар сайдын орлогч Татьяна Голикова Ерөнхийлөгч Владимир Путины оролцсон тус улс дахь эпидемиологийн бэлэн байдлын талаарх хуралд илтгэл тавих үеэрээ “Вектор төвийн боловсруулсан COVID-19-ийн эсрэг вакциныг ирэх есдүгээр сард багтаан улсын бүртгэлд хамруулна. Ингэснээр аравдугаар сараас вакциныг үйлдвэрлэж эхлэх боломжтой” гэж мэдээлж байв.
Дэлхийн хэмжээнд өнөөдрийн байдлаар “COVID-19”-ийн нийт өвчлөл 18.2 сая, нас баралт 692 мянгад хүрээд байна. Хойд хөрш ОХУ-д даваа гаригийн байдлаар коронавирусийн нийт өвчлөл 850 мянга, нас баралт 14 мянгад хүрчээ.
Оросын төрийн мэдлийн “Ria Novosti” агентлаг өнгөрөгч сарын 11-нд Вектор судалгааны хүрээлэнгийн эрдэмтэд өөрсдийн боловсруулсан “COVID-19”-ийн эсрэг вакцины хүн дээр хийх клиник туршилтын нэгдүгээр үе шатыг эхлүүлсэн талаар мэдээлж байв. Клиник туршилтын нэгдүгээр үе шатанд сайн дурын таван оролцогчдыг хамруулж, өнгөрөгч даваа гаригт хоёр дахь тунг тарьсан байна. Судалгааны явцын талаар “Reuters” агентлаг мэдээлэхдээ туршилтад хамрагдагсдын бүгдийнх нь биеийн байдал сайн байгаа талаар онцолсон юм. Клиник туршилтын хоёрдугаар үе шатыг долдугаар сарын 30-нд 18-60 насны 100 гаруй сайн дурын оролцогчдын хамруулан эхлүүлсэн байна.
ДЭМБ-ын “COVID-19”-ийн эсрэг вакцин гарган авах судалгааны ажлуудын бүртгэлд ОХУ-ын Вектор вирус судлал, биотехнологийн төвийн зургаан өөр вакцины туршилт бүртгэгдээд байгаа аж. Ирэх арваннэгдүгээр сараас үйлдвэрлэлд нэвтрүүлэхээр төлөвлөсөн вакцин нь ОХУ-ын хувьд коронавирусийн эсрэг боломжит хоёр дахь вакцины нэг юм.
Тухайлбал, ОХУ-ын Батлан хамгаалах яамны Гамалейн нэрэмжит эпдемиологи ба микро-биологийн судалгааны хүрээлэн болон Вектор төвийн хамтран боловсруулж буй “COVID-19”-ийн эсрэг өөр нэг вакцины клиник туршилтын эхний үе шат өнгөрөгч сарын эхээр дуссан талаар бид мэдээлсэн. Тэгвэл клиник туршилтын хоёрдугаар үе шат долдугаар сарын 28-нд дууссан. Эдгээр судалгааны ажлуудтай холбоотойгоор ОХУ-ын Эрүүл мэндийн сайд Михаил Мурашко өнгөрөгч амралтын өдрүүдэд Оросын эрдэмтдийн боловсруулсан коронавирусийн эсрэг вакцин аравдугаар сард бэлэн болж, нэн түрүүнд цар тахлын тэргүүн эгнээнд ажиллаж буй эрүүл мэндийн ажилтнуудыг вакцинжуулах болно гэж мэдэгдээд байна.
Эх сурвалж: TASS, Rossiya-1, Ria NOVOSTI, Reuters, WHO.int
