Орон нутгийн сонгуулийн санал хураалтын дүнгээр МАН нийслэлд үнэмлэхүй ялалт байгуулж, Нийслэлийн Иргэдийн Төлөөлөгчдийн хуралд 34 суудалтай болсон. Тиймээс Улаанбаатар хотын дарга, орлогч, НИТХ-ын даргаар хэн ажиллахыг вэ гэдгийг МАН шийдэх бүрэн эрхтэй юм. Олон хүн дарга болохоор санаархаж байна.
Өчигдөр нийслэлийн МАН-ын хорооны хурал болсон боловч санал нэгдэж чадалгүй тарсан гэдэг мэдээлэл байна. Өнөөдөр асуудлаа цэгцлэхээр үргэлжлүүлэн хуралдана. МАН-ын Удирдах зөвлөл шийдвэрээ аль эрт гаргасан.
Нийслэлийн сонгуульд Д.Сумъяабазар удирдаж орсныхоо хувьд нөлөөтэй байх нь дамжиггүй. Тиймээс ч өнгөрсөн өдрүүдэд “Сонгинохайрхан дүүргээс дараагийн хотын дарга тодорно” гэх яриа гараад байгаа. Өнөөгийн НИТХ-ын дарга Р.Дагва, нийслэлийн МАН-ын хорооны орлогч Н.Алтаншагай, Сонгинохайрхан дүүргийн Засаг дарга Ж.Сандагсүрэн гэсэн таамаг хүчтэй байсан юм. Р.Дагвын хувьд хотын дарга гэхээсээ НИТХ-ын дарга дээрээ байвал нас намбаны хувьд ч тохирно. Ер нь тэгээд сонгуулийн өмнө МАН-ын дарга нарын хэлж байснаас харахад хуучин удирдлагаас хүн үлдээх сонирхол бага байх болов уу.
Ж.Сандагсүрэнгийн хувьд дүүргийн даргаар ажиллаж байсан, Д.Сумъяабазарын хүн гэх. Гэвч дүүрэг удирдах, хот удирдах хоёр ялгаатай. Мөн Сонгинохайрхан дүүргийн өнөөгийн байдлыг харвал Ж.Сандагсүрэнд хот удирдаад явах чадвар дутахаар харагдаж байна.
Тэгэхээр дан Д.Сумъяабазар гэсэн түлхээсээр зүтгэлээ гээд амжилт олохгүй. Томилгоо ч хангалтгүй харагдаж байна. Тиймээс өөр сонголтуудыг бас эрэгзүүлэх нь зүйтэй юм. Тухайлбал, дүүрэг удирдаж байсан туршлагатай Н.Батсүмбэрэл, Ж.Алдаржавхлан байж болох юм. Дүүргийн дарга болгон л барьцах эрхтэй шүү дээ, энэ утгаараа.
Хэдийгээр Д.Сумъяабазар ялалт авчирсан боловч нийслэлийн Засаг даргыг томилох эрхийг Ерөнхий сайд У.Хүрэлсүх, МАН-ын Удирдах зөвлөл эдэлнэ. Ялалт бол сонгууль удирдсан хүндээ биш намын нийт массын дэмжлэг байдаг гэдэг утгаараа энэ нь ч зөв. Хотын даргыг НИТХ-д сонгогдсон хэдэн төлөөлөгч дундаас хайх нь ч өрөөсгөл зүйл юм. Харин хэн Ерөнхий сайдтай гар нийлэх вэ гэдэг л хамгийн чухал юм. За тэгээд хэрхэхийг Ерөнхий сайд мэднэ биз. Хамгийн гол нь өнөөдөртөө багтаж хотыг хэн удирдах вэ гэдгийг л тодруулах ёстойг надаар хэлүүлэлтгүй мэдэж байгаа байлгүй дээ. Тэгээд ч зарим нэг хүн хотын дарга яаж ажиллах ёстой вэ гэдэг стандартыг тогтоочихсон болохоор хэн дуртайг нь томилчихож болохгүй л байгаа биз. Намын нэр хүндийн асуудал болохоос хэн нэгний цүнх баригчийг шагнах шагнал, урамшуулал биш шүү дээ.
