“Алибаба” группын үүсгэн байгуулагч, тэрбумтан Жак Ма Хятадын эрх баригчдыг шүүмжилснээсээ хойш хоёр сарын турш олон нийтийн өмнө гарч ирсэнгүй гэж Forbes мэдээллээ.
Тодруулбал үеэр Жак Ма өнгөрсөн 11 дүгээр сард Шанхай хотод болсон нэгэн томоохон арга хэмжээний үеэр “Өнөөдрийн санхүүгийн систем бол аж үйлдвэрийн эрин үе. Бид хойч үе, залуу хүмүүст зориулж санхүүгийн шинэ систем бий болгох ёстой. Бид одоогийн тогтолцоогоо шинэчлэх ёстой” гэж хэлжээ. Түүнчлэн Бээжингийн санхүүгийн тогтолцоо инновацийг боомилж байна, дэлхийн банкны дүрэм “ахмад настны клуб” -тэй нэгэн адил хэмээн шүүмжилсэн нь Хятадын эрх баригчдын дургүйцлийг хүргэжээ.
Жак Ма өөрийн санаачлан зохион байгуулж буй Африкийн бизнес эрхлэгчдийн дунд зохиогддог “Africa’s Business Heroes” нэвтрүүлгийн үндсэн шүүгчээр ажиллаж, эцсийн шатны шалгаруулалтыг шүүх ёстой байсан ч 11 дүгээр сараас хойш үзэгдээгүй юм. Улмаар түүнийг шүүгчдийн бүрэлдэхүүнээс хассан талаар мэдээлэл цацагдсан. Мөн “Africa’s Business Heroes” сайтад байршуулсан Жак Магийн зургийг мөн устгажээ. Энэ талаар Alibaba группийн хэвлэлийн төлөөлөгч, Жак Ма шахуу цагийн хуваарийн улмаас нэвтрүүлгийн сүүлийн шатанд шүүгчээр оролцох боломжгүй болсон гэх тайлбарыг өгсөн гэж Financial Times мэдээлжээ.
Түүнчлэн Жак Ма хамгийн сүүлд 10 дугаар сарын 10-нд твиттер хуудсаа ашиглан жиргэсэн бөгөөд түүнээс хойш олон нийтийн сүлжээ ашиглаагүй байна.
ХЯТАДЫН ЗАСГИЙН ГАЗАР ANT GROUP-ИЙН IPO ГАРГАХ ТӨЛӨВЛӨГӨӨГ ЗОГСООЖЭЭ
Жэк Магийн үүсгэн байгуулсан санхүүгийн технологийн компани болох Ant Group өнгөрсөн 11 дүгээр сард дэлхийн түүхэнд хамгийн том IPO хийхээр төлөвлөж байсан ч Хятадын санхүүгийн зохицуулах хорооноос энэхүү үйл ажиллагааг цуцалсан билээ. Хэрэв энэ төлөвлөгөө хэрэгжсэн бол Ant Group Шанхай, Хонг Конгийн хөрөнгийн биржүүдээс нийт 37 тэрбум ам.долларыг босгож, дэлхийн түүхэнд бичигдсэн хамгийн том IPO ажиллагаа болох байв. Гэсэн хэдий ч Хятадын Засгийн газраас цуцалсан тухайд хууль журамд ялимгүй өөрчлөлт орсон гэхээс өөр тайлбар хэлээгүй юм.
Ant Group-ийн IPO гарахаас долоо хоногийн өмнө Жак Ма Шанхайд болсон арга хэмжээнд оролцож, Хятадын санхүүгийн тогтолцоог шүүмжилсэн мэдэгдэл хийсэн байжээ.
Ant Group нь анх 2004 онд Alipay нэрээр байгуулагдаж, онлайн худалдааны гүйлгээг хялбар шийдлээр хийж эхэлжээ. Ингэснээр онлайн худалдааны төлбөр тооцоог Хятад орон даяар хөнгөвчилж эхэлсэн байна. Тус компани 2011 онд Алибабагаас албан ёсоор өрх тусгаарлаж, тусдаа хуулийн этгээд болжээ.
ЖАК МАГИЙН ХӨРӨНГӨ СҮҮЛИЙН 2 САРД 11 ТЭРБУМ АМ.ДОЛЛАРООР БУУРАВ
Жак Магийн хөрөнгө сүүлийн хоёр сарын хугацаанд 11 тэрбум ам.доллароор багасаж, 50.9 тэрбум ам.доллар болоод байна. Тус улсын Засгийн газар түүний эзэмшил компаниудад нь шалгалт хийж байгаа нь үүнд нөлөөлжээ. Үүний зэрэгцээ Жак Ма өнгөрсөн онд “Bloomberg”-ийн тэрбумтнуудын жагсаалтын 20 дугаарт бичигдэж байсан бол одоогоор 25 дугаарт бичигдээд байна.
Ямартай ч БНХАУ-ын Засгийн газар Хятад хүн тэрбумтан болохыг бид дэмжинэ. Харин тэрбумтан болчихоод төрийн бодлогыг үгүйсгэхийг тэвчихгүй гэдэг маягтай өдрүүд өнгөрч байна.
