Коронавируст халдварын цар тахлын улмаас дэлхийн 190 гаруй улсад боловсролын байгууллагын танхимын сургалтыг түр хугацаанд хааж, нээсээр даруй жил гаруйн хугацааг үджээ. 2021 оны 1-р сарын 12-ны байдлаар дэлхий дахинд ойролцоогоор 825 сая сурагч, оюутнууд цар тахлын улмаас сургуульдаа явах боломжгүй болоод байна.
НҮБ-аас мэдээлж буйгаар сургуулиа улсын хэмжээнд хаасан 23 улс, бүс нутгийн хэмжээнд хаасан нь 40 байгаа ба энэ нь дэлхийн нийт суралцагчийн 47 хувийг хамарч байгаа аж. Ингэснээр 1 тэрбум гаруй хүүхэд хичээлээс хоцрох эрсдэлтэй байна. Мөн дэлхийн хэмжээнд нийт сурагчдын 31 хувь буюу 463 сая хүүхдүүд зурагтаар теле хичээл үзэх боломжгүй, алсын зайнаас сурах техник хэрэгсэлгүй, интернетгүй учир сурч чадахгүй байна. НҮБ-ын тайланд дэлхийн нийт сурагчдын гуравны нэг нь алсын зайнаас суралцах боломжгүй байгаа гэж дурджээ.
Дэлхийн улсууд цар тахлын үед оюутан, сурагчиддаа хоцрогдол үүсгэхгүй, сургалтын хүртээмжийг хэвийн явуулахын тулд боловсролын салбартаа авч хэрэгжүүлж байгаа зарим арга хэмжээнүүдээс дурдъя.
ЗАРИМ УЛСАД СУРАГЧИДДАА iPAD ӨГЧЭЭ
Алсын зайнаас суралцах зарим сурагчид техник технологийн хэрэгслүүд хангалтгүй байгаа нөхцөл байдлыг харгалзан зарим улс сурагчиддаа iPad өгчээ.
Жишээ нь Нью-Йорк хотын Боловсролын хэлтсээс нэг бүр нь 897 ам.долларын үнэ бүхий 300 мянган iPad-ийг хөл хорионы үед гэрээсээ суралцаж байгаа сурагчдад өгчээ. Энэ нь нийт 269,1 сая ам.доллар болж байгаа аж.
Мөн Англид эмзэг бүлгийн хүүхдүүдэд зориулж зөөврийн компьютерийг хөнгөлөлттэй үнээр зээлж авах нөхцөлийг бүрдүүлжээ. Түүнчлэн Канадын Онтарио мужид алсын зайнаас сурахад хэрэглэгдэх техник хэрэгсэлгүй 6500 гаруй хүүхдүүдэд үнэгүй дататай iPad өгчээ.
ИХ ДЭЭД СУРГУУЛИУД ТӨЛБӨРӨӨ ТОДОРХОЙ ХЭМЖЭЭГЭЭР ХУВИАР БУУРУУЛЖ БАЙНА
Дэлхийн томоохон их дээд сургуулиудын захиргаанаас цар тахлын улмаас үүсэх эдийн засгийн байдлыг харгалзан сургалтын төлбөрөө тодорхой бууруулах, төлбөр төлөлтийг уян хатан болгох арга хэмжээг авчээ. Нью-Жерси мужийн зарим их сургууль бакалаврын түвшний төлбөрөө бууруулсан. Жишээ нь, тус мужийн Роуаны их сургууль нь коронавирусын цартахлын улмаас сургалтын төлбөрөө 10 хувиар бууруулжээ. Ингэснээр оюутнуудад дунджаар 1438 ам. доллар хэмнэх боломжийг олгож байгаа юм. Мөн Австралийн зарим их сургууль сургалтын төлбөрөө бууруулаагүй ч төлбөр төлөх схемээ уян хатан болгож хуваан төлөх нөхцөлийг шинээр нэвтрүүлжээ.
ХИЧЭЭЛИЙГ ИНТЕРАКТИВ БАЙДЛААР БУЮУ БАГШ, СУРАГЧИД ЦАХИМААР ШУУД ХОЛБОГДОН ХИЙЖ БАЙНА
Ковид-19 цар тахал хүн төрөлхтний эрүүл мэнд, нийгэм, эдийн засгийн байдалд сөргөөр нөлөөлж байгаа ч нөгөөтээгүүр техник, технологи, алсын зайн сургалтын хөгжлийг ахиулж багш, сурагчдын цахим хэрэглээний чадварыг нэмж байна гэхэд хилсдэхгүй. Өдгөө дэлхий дахинд ойролцоогоор 825 сая сурагч цар тахлын улмаас сургуульдаа явах боломжгүй байна. Ингэхдээ улс бүр өөр өөрийн арга барилаар сурагчиддаа алсын зайн боловсролыг олгож байгаа юм. Жишээ нь Австралид дунд сургуулийн багш нь онлайн платформд даалгавруудаа тайлбарлаж бичээд оруулчихсан байдаг ба хүүхэд түүнийг тодорхой хугацаанд буюу дунджаар долоо хоногт багтаан хийж гүйцэтгэх ёстой байдаг аж. Мөн хүүхэд нэвтэрч орсон ирцээ нэг асуумж бөглөн бүртгүүлдэг байна. Түүнчлэн Австри улсад Moodle, LMS зэрэг сургалтын платформуудыг ашиглан сурагчид багштайгаа холбогдон, асуулт асууж, шууд харьцах байдлаар хичээллэж үзэж байна. Багштайгаа шууд холбогдон суралцах нь сурагчдын ойлгох чадвар, хичээл хийх бүтээмжид илүү эергээр нөлөөлдөг байна.
ХҮҮХДҮҮДИЙГ ГЭРТЭЭ ХҮЧИРХИЙЛЭЛД ӨРТӨХӨӨС СЭРГИЙЛЖ ТУСГАЙ ҮЙЛЧИЛГЭЭГ НЭВТРҮҮЛЖЭЭ
Сургуулийн үйл ажиллагаа хаасантай холбоотойгоор хүүхдүүд гэртээ гэр бүлийн хүчирхийлэлд өртөх тохиолдол дэлхий дахинд ихэсчээ. Жишээ нь, Францад гэр бүлийн хүчирхийллийн хэрэг, дуудлага мэдээлэл 32 хувиар огцом нэмэгдсэн бол Литва улсад 2019 оны мөн үетэй харьцуулахад 20 хувиар илүү болжээ. Тиймээс Францад гэр бүлийн хүчирхийллийн эсрэг үйлчилгээндээ нэг сая евро төвлөрүүлжээ. Мөн зочид буудлын өрөөнүүдийг гэр бүлийн хүчирхийлэлд өртсөн хохирогчдыг хамгаалах байр болгох түр журам боловсруулжээ. Түүнээс гадна эмийн санч, дэлгүүрийн худалдагчдад хүчирхийлэлд өртсөн хүүхдийг таних, тэдэнд тусламж үзүүлэх сургалтад хамруулжээ.
