Өчигдөр Хөвсгөл аймгийн Ханх сумын “Хачим” болон “Адуут” гэх газар 4.3 магнитудын хүчтэй газар хөдлөлт болсон байна.
Тодруулбал, тус сумын
- Хороо багийн “Хачим” гэх газар “Хөвсгөл нуур”-нд /аймгийн төвөөс хойд зүгт 337 км-т, сумын төвөөс баруун урд зүгт 29 км-т, 02.06-ны өдрийн 08:56 цагт 4.0 магнитудын хүчтэй газар хөдлөлт болсон тухай мэдээллийг мөн өдрийн 09:08 цагт ООГХ-ээс утсаар хүлээн авсан.
- Хороо багийн “Адуут” гэдэг газар “Хөвсгөл нуур”-нд /аймгийн төвөөс хойд зүгт 320 км-т, сумын төвөөс баруун урд зүгт 37 км-т, мөн өдрийн 22:16 цагт 4.3 магнитудын хүчтэй газар хөдлөлт болсон тухай мэдээллийг 22:31 цагт ООГХ-ээс утсаар хүлээн авсан. Тус аймгийн Онцгой байдлын газраар дамжуулан тус сумын Засаг даргаас тодруулахад иргэдэд чичирхийлэл мэдрэгдсэн бөгөөд учирсан хохиролгүй тухай мэдээлсэн байна.
Хөвсгөл аймагт он гарсаар цөөнгүй удаа газар хөдлөлт болж буй тул иргэд болзошгүй эрсдэлээс сэргийлэхийг тулд хувийн бэлтгэлээ сайтар базааж, газар хөдлөхөд айж, сандралгүйгээр гэрээсээ гарах, цонхноос хол байж, цахилгаан хэрэгслээ унтраах зэрэг мэдээлэлтэй байхыг зөвлөж байна.
