Шадар сайд С.Амарсайхан, Эрүүл мэндийн сайд С.Энхболд нар ХӨСҮТ-д ажиллаж байна. Тус эмнэлгийн Тандалт судалгааны албанд 70 орчим хүн 08.30-23.00 цагийн хооронд ажиллаж байна.
УОК-ын дарга, Шадар сайд С.Амарсайхан Халдварт өвчин судлалын үндэсний төвд ажиллах үеэр тус төвийн захирал болон дэд захирал Э.Тэмүүлэн нөхцөл байдлыг танилцууллаа.
Шадар сайд: Тусгаарлагдсан иргэд шинжилгээ авалгүй удаж байна гэж их гомдол мэдүүлж байна. Энэ сарын 11-нд БШУ-ны яам, Үндэсний статистикийн газарт сэжигтэй тохиолдол илэрсэн. Хоёр байгууллага нэг байранд байдаг. Сэжигтэй тохиолдол олон газраар явсан байсан. Гэтэл нэг л давхрыг ариутгаад, зарим хүнээс шинжилгээ аваагүй байна. ХӨСҮТ, ЗӨСҮТ-ийн ажлын уялдаа хангалтгүй байна. Иймд бид газар дээр нь ирж байна. Надад иргэдээс гомдол их ирж байна. Жижиг асуудал гээд хаяж болохгүй. Олон жижиг асуудал том асуудал үүсгэнэ.
-Зардал мөнгөө тооцоолоод бид дам хавьтлаас шинжилгээ авдаггүй. Манайд шөнө бүр 200 орчим хүн хонож ажиллаж байна. Ковидоос гадна сүрьеэ, хепатитийн өвчтөнүүдэд мөн үйлчилгээ үзүүлж байна. Ер нь сүүлийн үед халдвар авсан иргэдийн биеийн байдал хүндэрч байна.Өнгөрсөн долоо хоногт манайд 2 хүн нас барсан. Ковидийн халдвартай, биеийн байдал нь хүнд байгаа нэг өвчтөнд эмч, сувилагч нийлээд 10 хүн үйлчлэн ажиллаж байна. ECMO аппаратад орсон өвчтөн манайд 1, Цэргийн төв эмнэлэгт 1 бий. Манай Эмчилгээ эрхэлсэн дэд дарга, Сургалтын алба, Хүний нөөцийн албаны дарга болон Чанарын алба гэрийн тусгаарлалтад орсон. Завхан,Төв аймагт манай эмч нар ажиллаж байна.
Шадар сайд: Зарим газарт халдваргүйтгэл дутуу хийжээ.
-ЗӨСҮТ халдваргүйтгэл хариуцдаг. Зарим хүнийг гэрт нь тусгаарлаж байна. Хүн гэртээ байхад нь ариутгал хийх боломжгүй, химийн бодисууд хэрэглэдэг.
-Ойрын хавтьтлууд гэр бүлийн хүрээнээс халилаа. Үзвэр үйлчилгээний газруудад халдвар тарсан. Сүүлийн өдрүүдэд халдвар нэмэгдсэн тул зочид буудлын хүрэлцээ багасаж байна. Ойрын хавьтлуудыг зочид буудал рүү тээвэрлэх нь зардал чирэгдэлтэй боловч буудалд оруулсны дараа нэг дор олон хүнээс шинжилгээ авахад цаг хэмнэдэг.
-Шадар сайд: Илүү цагийн хөлсийг нь ажилчдадаа өгсөн үү?
-Эмч нараас бусад нь илүү цагийн цалингаа авсан. Жолооч нар олон цагаар дуудагдан ажиллаж байна. Сувилагч, жолооч нарт илүү цагийн мөнгийг нь өгсөн. Эмч нарт дараагийн удаа олгоно.
-Манай ажилчид энд 14 хоног, зочид буудалд 14 хоног тусгаарлагдаад сарын дараа гэртээ харьдаг. 200 хоног гэртээ хариагүй ариутгагч бий. хамгийн их ачаалалтай байгаа нь жолооч, ариутгагчид. Бусад нь сэлгэж ажиллах боломжтой. Хүмүүс туйлдаж байна.Машин нэмүүлэх шаардлага байна.
Шадар сайд: Үүнийг бид ойлгож байна. Машинаа шийдүүлэх нь та нарын асуудал. Бэлэг хүлээж байгаа юм шиг хүлээж болохгүй. Машин том асуудал биш. Бусад эрүүл мэндийн төвүүдэд шинжилгээ мөн хийж байна. Ганц танайх шинжилгээ хийх хүчин чадалтай биш. Бусад эмнэлэг рүүгээ хуваарил. Яагаад ганцхан танайд бүх сорьц овоорч байна вэ?
-PCR шинжилгээ авсан тоогоороо манай улс АНУ, Япон, Солонгосоос өндөр хувьтай байна. Эдийн засгийн хувьд их ачаалал үүсэж байна.
Дэлхий нийтэд өргөнөөр коронавирусийн шинжилгээг хийж байна. Манай улсад энэ арга хэмжээг маш сайн авсан. Гурван эмнэлэг рүү бүх батлагдсан тохиолдлуудаа хуваарилснаар халдварыг цааш нь тархахгүй болгож байгаа. Ингээд ойрын хавьтлуудыг тодорхойлох ажлыг явуулдаг. Судалгааны үр дүнд нийт хавьтлуудын 90-ээс дээш хувийг олдог.
Олсон хавьтлуудаа 14 хоног тусгаарладаг. ХӨСҮТ-ийн хувьд ямар ч өвчлөлгүй үед бэлэн байдлаа хангаж байсан. Тохиолдлын тоо ихсээд, хүн амын дунд өргөн тархалт үүссэн үед тандалтын хариу арга хэмжээ өөрчлөгддөг. Энэ үед батлагдсан тохиолдлуудаа хөнгөн бол гэрт нь тусгаарлах гэх мэт арга хэмжээ авч байна. Сүүлийн 7 хоногийн нөхцөл байдлаас харахад хүн амын дундах халдварын өргөн тархалт руу орж байгаа нь санаа зовоож байна.
Харин Завхан, Төв аймаг хоёрдугаар үе шатанд байгаа.
Бүртгэгдсэн 81 кластер байна. Үүнээс 21 нь хянагдаж дууссан. Одоогийн байдлаар 41 идэвхтэй кластер байна. Халдвар зөвхөн орон зайгаар хязгаарлагдахгүй. Драмын театртай холбоотой кластер олон хүнийг хамруулж, 450 ойрын хавьтал бүртгэгдээд байна. 14 хоногийн дараа өдөрт 150-400 хүртэл халдвар гарах магадлал 50 хувьтай байна” хэмээв.
Харин ХӨСҮТ-ийн ажилчдад тулгамдаж буй асуудлын тухайд “Илүү цаг, ажлын ачаалал зэрэг нийгмийн асуудал тулгамдаж байна” гэлээ.
