УИХ-ын гишүүн Ж.Сүхбаатар: Төрийн байгуулалтын байнгын хороо гэдэг бол Үндсэн хуулийн байнгын хороо юм. Тэгэхээр Үндсэн хуульт байгууллагыг хамгаалах, Үндсэн хуульд захирагдах ёстой. Үндсэн хуулиа л барьж ажиллаарай. Ямар нэгэн асуудал үүсээд хариулт өгөх боллоо гэхэд Үндсэн хуулиа барьж ажиллаарай. Үндсэн хуулийн нэмэлт өөрчлөлтийг 10 жил бэлдсэн учраас сайн хийгдсэн. Одоо үүнийг амилуулах ажил явж байна. Улс төрийн намын тухай хууль хүлээгдэж байгаа. Энэ бол таны хамгийн гол эхний даалгавар байгаа. Мөн Нэгжийн тухай хууль байгаа. Нэгжийн тухай хуулийг хэрэгжүүлэхийг Засгийн газарт даалгасан. Үүнийг та анхаараарай. Хууль батлах нэг хэрэг. Зөв хуулийг амьдралд хэвшүүлэхэд байнгын хорооны даргын үүрэг чухал шүү.
УИХ-ын Ж.Мөнхбат: Сүхбаатар гишүүний хэлсэн эхний хоёр саналтай санал нэг байна. Үндсэн хуулийн нэмэлт, өөрчлөлттэй холбоотой асуудал бол тийм амар зүйл биш. Үндсэн хуульд өөрчлөлт хийнэ гэдэг бол нийгмийн зөвшилцлийн асуудал.
УИХ-ын гишүүн Н.Энхболд: Ж.Мөнхбат даргадаа амжилт хүсье. Төрийн байгуулалтын байнгын хорооны хэлэлцэж байгаа асуудлыг анзаарахгүй өнгөрчихөөд байдаг зүйлүүд байдаг. Гэхдээ Төрийн байгуулалтын байнгын хорооноос гаргаж байгаа шийдвэр нийгмийн суурийг тавьдаг. Энэ ч утгаараа улс төрийн дарамтууд зохион байгуулалттайгаар ирдэг. Ерөнхийлөгчийн тухай хуулийн ажлын хэсгийн ахлагчаар би ажиллаж байна. Энэ хуулийг сонгуулиас өмнө амжуулаад батлах хэрэгтэй. Тэр хүн Монгол Улсын иргэдтэй ямар гэрээ хийж Ерөнхийлөгч болж байгаа вэ гэдэг бүрэн ойлголттой болоод сонгуульдаа оролцох ёстой. Тэгэхээр сонгуулиас өмнө Ерөнхийлөгчийн сонгуулийн тухай хуулийг Үндсэн хуулийн нэмэлт, өөрчлөлтүүдтэй уялдуулаад хийх ёстой. Сүүлийн 30 жилд манай нийгэм, улс төрд болж байсан олон маргаантай асуудал, эрх мэдлийн хуваарилалтын тэнцвэр алдагдсан нь бүгд үүнээс эхтэй. Тиймээс шинэ дарга энэ асуудалд анхаарлаа хандуулж ажиллаарай.
