Ёс зүй, дэгийн байнгын хорооны хурлаар Монгол Улсын хууль, УИХ-ын тогтоол, байнгын хорооны тогтоолын хэрэгжилтэд хийсэн хяналт, шинжилгээ, үнэлгээний дүнгийн 2024 оны жилийн эцсийн танилцуулгыг сонслоо.
Хяналт – Шинжилгээ – Үнэлгээний мэдээллийн цахим санд Монгол Улсын нийт 89 хуулийн 481 заалт, УИХ-ын 104 тогтоолын 624 заалт, УИХ-ын Байнгын хорооны 79 тогтоолын 455 заалт, нийт 272 шийдвэрийн 1550 заалт бүртгэлтэй байна.
Дээрх хууль, тогтоомжийн актуудад үнэлгээ хийхэд:
УИХ болон УИХ-ын байнгын хорооны шийдвэрийн үнэлгээний ангиллаар авч үзэхэд 36.7 хувь нь бүрэн хэрэгжсэн, 25.2 хувь нь хэрэгжилтийн шатанд, 14.5 хувь нь хэрэгжилт хангалтгүй, 12.6 хувь нь хэрэгжээгүй гэж дүгнэгдсэн бөгөөд хэрэгжилт тооцох хугацаа болоогүй гэсэн үндэслэлээр 170 заалт үнэлэгдээгүй байна. Хэрэгжилт дунджаар 66.4 хувьтай гарчээ.
Хуралдааны үеэр гишүүд хууль, тогтоолоор үүрэг, чиглэл болгосон Улсын Их Хурлын шийдвэрийн биелэлтийн тайланг үнэлж, дүгнэхдээ илүү үр дүнд чиглэх шаардлагатай байгаа бөгөөд Монгол Улсын ёс зүйн хорооны харъяалалд байгаа дэд хороодын зохион байгуулалтыг тодорхой болгох, цахим орчин дахь ёс зүйн хэм хэмжээг тогтоох хуулийн гарц гаргалгааг бий болгох шаардлагатай байгааг тодотгож байв.
